मध्यपूर्वको युद्धसंगै युरोपमा बढ्यो धार्मिक र जातीय भेदभाव

नेपाल इजरायल डट कम जेरुसलेम । इजरायलविरुद्ध हमासको आक्रमणपछि युरोपमा मुस्लिम विरोधी घृणा बढेको उल्लेख गर्दै, युरोपेली संघ (ईयू)को अधिकार एजेन्सीले मुस्लिमहरू अझ बढी जातिवाद र भेदभावको सामना गरिरहेको जनाएको छ।

‘युरोपियन युनियन एजेन्सी फर फन्डामेन्टल राइट्स’ (एफआरए) का अनुसार, ७ अक्टोबर २०२३ मा हमासले इजरायलमा आक्रमण गरेपछि गाजामा प्रतिशोध स्वरूप इजरायली आक्रमण सुरु भएलगत्तै मुस्लिम विरोधी घटनाहरूमा वृद्धि भएको विभिन्न ईयू देशहरूले रिपोर्ट गरेका छन्।

एफआरएका प्रवक्ता निकोल रोमेनका अनुसार, हमासको आक्रमणपछि मुस्लिम विरोधी घृणा र यहूदी विरोधी भावना बढेको रिपोर्टहरू प्राप्त भइरहेका छन्।

सन् २०१६ मा गरिएको एक सर्वेक्षण अनुसार, युरोपेली संघमा करिब ५० प्रतिशत मुस्लिमहरू आफ्नो दैनिक जीवनमा जातिवाद र भेदभावको शिकार हुने गरेका छन्, जुन अघिल्लो सर्वेक्षणको ३९ प्रतिशतबाट बढेको हो। अस्ट्रिया, जर्मनी, र फिनल्यान्डमा सबैभन्दा बढी भेदभाव रेकर्ड गरिएको छ।

एफआरएका निर्देशक सिर्पा राउटिओले युरोपभर मुस्लिम समुदायविरुद्ध जातिवाद र भेदभावमा चिन्ताजनक वृद्धि देखिएको बताएका छन्। उनले मध्यपूर्वको द्वन्द्व र मुस्लिम विरोधी प्रदर्शनहरूले यो अवस्था झन् गम्भीर बनाएको बताए।

अक्टोबर २०२१ देखि अक्टोबर २०२२ सम्म १३ युरोपेली देशका ९,६०० भन्दा बढी मुस्लिमहरूमा गरिएको सर्वेक्षणमा, धर्म, छालाको रङ, जातीय वा आप्रवासी पृष्ठभूमिका कारण मुस्लिम महिला, पुरुष र बालबालिका भेदभाव र हिंसामा परेको उल्लेख गरिएको छ।