गैरआवासीय नेपाली संघ (एनआरएनए) राष्ट्रिय समन्वय परिषद् इजरायलद्वारा आज शनिबार अन्तर्राष्ट्रियस्तरको वक्तृत्वकला प्रतियोगिता आयोजना हुन गइरहेको छ ।
संस्थाका अध्यक्ष श्रीकृष्ण भण्डारीका अनुसार नेपाली प्रतिभा र कलालाई अन्तर्राष्ट्रिय स्तरमा उजागर गर्ने तथा विभिन्न देशका एनआरएनए परिषद्हरूबीच सम्बन्ध र सहकार्य प्रवर्धन गर्ने उद्देश्यले यो कार्यक्रम आयोजना गरिएको हो । यस अघि पनि संस्थाले यस्तै प्रकृतिका रचनात्मक कार्यक्रमहरुको आयोजना गर्दै आएको थियो ।
प्रतियोगितामा ३० जना प्रतिस्पर्धीले भाग लिदैछन्, जसलाई प्रारम्भिक चरणबाट छानिएको हो। प्रतिस्पर्धीहरू बेलायत, जापान, मलेसिया, इजरायल, अमेरिका, रसिया, थाइल्याण्ड, पोल्याण्ड, कोरिया, जर्मनी, स्वीडेन, क्यानाडा, माल्टा लगायतका देशहरूबाट छन्। यस प्रतियोगितामा पहिलो हुनेलाई २ लाख रुपैयाँ, दोस्रो हुनेलाई १ लाख रुपैयाँ, र तेस्रो हुनेलाई ५० हजार रुपैयाँ पुरस्कार प्रदान गरिनेछ।
प्रतियोगितामा इजरायलबाट अविना भट्टराई, भूमिका श्रेष्ठ, कल्याण जोशी, मिना बिक, राजन दुवाडी र श्वेता भण्डारी बस्याल गरी ६ प्रतियोगीले सहभागिता जनाउदैछ्न । यो एनआरएनए राष्ट्रिय समन्वय परिषद् इजरायलद्वारा आयोजित दोस्रो अन्तर्राष्ट्रियस्तरको वक्तृत्वकला प्रतियोगिता हो। पहिलो प्रतियोगितामा क्रमशः सोमिरा केसी (रसिया), जस्मिन सैयद (साउदी अरब), र टिया आचार्य (बेलायत) विजयी भएका थिए ।
कार्यक्रमको प्रमुख अतिथि शिक्षा, विज्ञान तथा प्रविधि मन्त्री विद्या भट्टराई रहनुहुनेछ। अन्य विशिष्ट अतिथिहरूमा एनआरएनएका संस्थापक अध्यक्ष डा. उपेन्द्र महतो, पूर्व अध्यक्षहरू जीवा लामिछाने, कुमार पन्त, वर्तमान अध्यक्ष डा. बद्री केसी, तथा संस्थापक सदस्यहरू भीम उदास र रामप्रताप थापा रहनेछन्।
निर्णायक मण्डलमा संघका पूर्व अध्यक्ष जीवा लामिछाने, चलचित्र विकास बोर्डका अध्यक्ष दिनेश डिसी, र पूर्व मिस नेपाल सुगारीका केसी समावेश छन्। कार्यक्रमको सञ्चालन पत्रकार समा थापाले गर्नेछिन्।
गैरआवासीय नेपाली संघ राष्ट्रिय समन्वय परिषद इजरायलकाे स्थापनाको १७ औं वार्षिकोत्सवका अवसर हुन गैरहेको सो कार्यक्रम जुम भर्च्युअलका माध्यमबाट शनिबार अपराह्न ५ बजे अनलाइन संचालन हुनेछ । भर्च्युअल प्लेटफर्म जूममा मिटिङ्ग आइ डि 97863369098- र पास – 2024 लगिन गरेर सहभागी हुन सकिन्छ ।
यो प्रतियोगिता नेपाली समुदायका प्रतिभाहरूलाई विश्वव्यापी मञ्च प्रदान गर्ने प्रयासको एक हिस्सा हो, जसले नेपाली कला, संस्कृति, र विचारलाई अन्तर्राष्ट्रिय स्तरमा प्रवर्द्धन गर्ने लक्ष्य राखेको छ। एनआरएनए इजरायल सेवामुलक, सामाजिक र सिर्जनशील कार्यहरु गर्दै आएको छ ।
नेपाल इजरायल डट कम - इजरायलमा रहेको नेपाली समुदायमा हुने विविध गतिविधि, सूचना र जानकारी पस्कने अनलाइन पत्रिका हो । info@nepalisrael.com
%20(1).gif)
