प्यालेस्टिनी आतंकवादी हमलामा २ इजरायली सैनिक हताहत, ८ घाइते - आतंककारी पनि मारिए

४ फेब्रुअरी, इजरायल

मंगलबार बिहान उत्तरी सामरियाको तायासिर गाउँ नजिकै रहेको सैन्य चौकीमा एक आतंकवादीले सैनिकहरूलाई लक्षित गर्दै अन्धाधुन्द गोली चलाउँदा आठ इजरायली घाइते भए, जसमध्ये दुई सैनिकको मृत्यु भएको छ।

इजरायली सुरक्षाबलले गोली हानाहानपछि आतंकवादीलाई मारेर हमला समाप्त गरेको इजरायल डिफेन्स फोर्स (आईडीएफ) ले जनाएको छ। इजरायल र हमास युद्ध विराम भएर कैदी आदान प्रदान भैरहेको अवस्थामा यो आतंकवादी हमला भएको हो ।

मागेन डेविड अडोम (एमडीए) आपतकालीन चिकित्सा सेवाका महाप्रबन्धक एली बिनका अनुसार, दुई जना घाइतेको अवस्था मध्यम छ।
एमडीएको अर्को विज्ञप्तिमा भनिएको छ कि घटनास्थलमा प्रारम्भिक उपचार प्राप्त गरेका छ जना घाइतेलाई हेलिकप्टरमार्फत इजरायली अस्पतालहरूमा लगिएको थियो—चार जनालाई पेटाह टिक्वास्थित बेलिन्सन अस्पतालमा र दुई जनालाई हाइफास्थित रामबाम अस्पतालमा लगिएको थियो।

यो गाउँ त्यस्तो क्षेत्रमा पर्दछ जहाँ इजरायली सेनाले पछिल्लो दुई हप्तादेखि “अपरेशन आइरन वाल” नामक ठूला आतंकविरोधी कारबाही सञ्चालन गरिरहेको छ।
आईडीएफले सोमबार उक्त अपरेशनलाई विस्तार गर्दै अपरेशन समाप्त भएपछि पनि जेनिन र तुलकरम क्षेत्रमा रहिरहन नयाँ बटालियन खडा गर्ने योजना बनाएको छ।

आईडीएफका अनुसार, जनवरी २१ देखि सुरू भएको कारबाहीयता ५० भन्दा बढी प्यालेस्टाइनी आतंकवादी मारिएका छन्।
त्यसमध्ये ३५ जना जेनिन र तुलकरम क्षेत्रमा भएको स्थल कारबाहीमा मारिएका थिए भने अन्य १५ जना हवाई हमलामा मारिएको बताइएको छ। हालसम्म १०० भन्दा बढी आतंकवादी पक्राउ परिसकेका छन्।

“अपरेशनको क्रममा सेनाले दर्जनौं हतियार बरामद गरेको छ, सयौं विष्फोटक उपकरण नष्ट गरेको छ, र सेनालाई क्षति पुर्‍याउने उद्देश्यले सडकहरूमा राखिएका थप दर्जनौं बमहरू ध्वस्त पारेको छ,” आईडीएफले जनाएको छ।

आइतबार, कारबाहीको दायरा तम्मुनसम्म विस्तार गरिएको थियो, जुन नब्लस नजिकैको टूबासको दक्षिणमा रहेको प्यालेस्टिनी सहर हो।
जनवरी २० मा, जेनिन नजिकैको एउटा सहरमा सडकमा राखिएको बम विष्फोट हुँदा एक इजरायली सैनिक मारिएका थिए भने चार अन्य घाइते भएका थिए।

आईडीएफका अनुसार, आइतबार जेनिन क्षेत्रका “धेरै भवनहरू, जुन आतंकवादी आधारको रूपमा प्रयोग गरिएका थिए,” ध्वस्त पारिएको थियो।

आईडीएफले बताएअनुसार, सुरक्षाबलहरूले जेनिन क्षेत्रमा २३ वटा संरचना ध्वस्त गरेका छन्, जहाँ आतंकवादी पूर्वाधार रहेको थियो। यस क्षेत्रमा सयौं भवनहरूको खोजी गर्दा विष्फोटक प्रयोगशाला, हतियारहरू, निगरानी केन्द्रहरू, र अन्य आतंकवादी पूर्वाधार फेला परेको थियो।

मंगलबारको हमलापछि जोर्डन भ्याली क्षेत्रीय परिषदका प्रमुख डेभिड एल्हायानीले कान रेशेत बेट रेडियो स्टेशनसँग कुरा गर्दै भने, “उत्तर सामरियामा आईडीएफले गरिरहेको अपरेशन पर्याप्त छैन । यो अपरेशन अझै विस्तार गर्न आवश्यक छ।”