इजरायल जान छनोट भएका केयरगिभरको नामावली प्रकाशित (रिजल्ट हेर्नुहोस्)

वैदेशिक रोजगार विभागले विभागको वेबसाइटमा एक सुचना प्रकाशित गरी इजरायलमा केयर गिभरमा जान आवेदन दिएकाहरुमध्ये गोलाप्रथाबाट छनोटमा परेका उम्मेदवारहरुको नामावली प्रकाशित गरेको छ ।

सुचनामा भनिएको छ – नेपाल सरकार र इजरायल सरकारबीच भएको श्रम सम्झौता अनुसार इजरायलका दीर्घकालीन स्याहार केन्द्रमा पठाउने नेपाली सहायक कामदार छनौटका लागि वैदेशिक रोजगार विभाग, ताहाचल, काठमाडौँको मिति २०८१/०३/११ मा प्रकाशित सूचना अनुसार तोकिएको समयभित्र अनलाइन दरखास्त पेश गरेका उम्मेदवारहरु मध्ये दरखास्त स्वीकृत भई इजरायल पक्षबाट संचालन गरिने Random selection (lottery) का लागि पठाइएकोमा मिति २०८१/०६/१३ तदनुसार September 29, 2024, समय दिउँसो ४:२१ बजे) महिला ११५६. पुरुष ९५६ गरी कूल २११२ उम्मेदवारहरु lottery बाट छनौट भएको भनी PIBA को इमेल मार्फत् आधिकारिक जानकारी प्राप्त भएकाले देहाय बमोजिमको पासपोर्ट नम्बर, नाम, थर, रजिष्ट्रेशन नम्बर र रन नम्बर भएको नतिजा सार्वजनिक गर्ने छनौट समितिको मिति २०८१/०६/१४ निर्णय बमोजिम सम्बन्धित सबैको जानकारीको लागि यो सूचना प्रकाशित गरिएको छ ।

स्वास्थ्य परीक्षण (Medical Test) लगायतका अन्य थप विषयमा विभागको वेबसाइट मार्फत् पछि जानकारी गराइनेछ ।

नेपाल सरकार र इजरायल सरकारबीच २०७६ असोज १४ गते सम्पन्न श्रम सम्झौताअनुसार इजरायलका दीर्घकालीन केयरगिभरका लागि नेपाली सहायक कामदार पठाउन लागेको हो ।

इजरायलमा आर्कषक कमाई हुने कारण नेपाली युवाहरु आर्कषित भएको पाईन्छ। इजरायल रोजगारमा जानेहरुले एक वर्षको करार अवधिको लागि जाने भएपनि ५ वर्षसम्म भिसा थप गरेर काम गर्न सक्छन् ।

इजरायलको केयरगिभरका लागि चार हजार २४ जनाको आवेदन परेको थियो । जसमा दुई हजार २०९ पुरुष र एक हजार ८१५ महिला थिए । आवेदनमध्ये विभागले तीन हजार ४६१ को स्वीकृत गरेको थियो । जसमा एक हजार ८६३ पुरुष र एक हजार ५९८ महिला थिए । विभागले ३२१ वटा (१९७ पुरुष र १२४ महिला) को आवेदन अस्वीकृत गरेको थियो ।

कागजात नपुगेका २४२ (१४९ पुरुष, ९३ महिला) को आवेदन अस्वीकृत भएको थियो । विभागले तीन हजार ४६१ (एक हजार ८६३ पुरुष, एक हजार ५९८ महिला) को आवेदन नेमचेकका लागि इजरायल पठाएको थियो ।

शुरुमा इजरायलले ५०० मुख्य उम्मेदवार र ३०० वैकल्पिक उम्मेदवारको माग गरेको थियो । पछि यो संख्या थपेर २००० पुर्याएको थियो । केयरगिभरका लागि मासिक तलब पाँच हजार ८८० इजरायली मुद्रा (करिब दुई लाख रुपैयाँ) रहेको विभागले जनाएको छ ।

इजरायली सरकारको नियमानुसार ओभर टाइमको सुविधा हुनेछ भने कामदारले प्रत्येक हप्ता ६ दिन काम गर्नुपर्नेछ । प्रति हप्ता ४२ घण्टा काम गर्नुपर्नेछ । करार अवधि एक वर्षको हुनेछ ।

खाना कामदार आफैले व्यहोर्नु पर्नेछ भने बस्ने व्यवस्था रोजगारदाताले गर्नेछ भने तर, त्यसको खर्च कामदार आफैले गर्नुपर्नेछ । करार अवधि अधिकतम पाँच वर्षसम्म थप गर्न सकिनेछ ।