इजरायलको बंकरमा फसेका विद्यार्थीलाई प्रधानमन्त्री प्रचण्डको फोन, छिट्टै उद्धारको आश्वासन

काठमाडौं । इजरायलको सेदोत नेगेभस्थित बंकरमा रहेका नेपाली विद्यार्थीलाई प्रधानमन्त्री प्रचण्ड र परराष्ट्रमन्त्री एनपी साउदले फोन गरेका छन् ।

बंकरमा रहेका दाङ नारायणपुरका विपिन सुवेदीले प्रधानमन्त्री प्रचण्डले सुरक्षित बस्न आग्रह गरेका बताए । सरकारले सक्दो छिटो उद्धारका लागि सबै प्रयास गरिरहेको भन्दै तयारी अवस्थामा बस्न पनि प्रधानमन्त्रीले भने ।

प्रधानमन्त्रीलाई उद्धृत गर्दै विपिनले भने, ‘सक्दो छिटो उद्धारका लागि प्रयास भएको छ, धैर्य गर्दै सुरक्षित बस्नुहोस् भन्नुभयो ।’

प्रधानमन्त्रीलाई विपिन र साथीहरुले आफूहरुलाई यो बेला शीघ्र नेपाल फर्कने चाहना बाहेक अरु केही नचाहिएको भन्दै सरकारसमक्ष गुहार मागे ।

प्रधानमन्त्रीले इजरायल सरकारको अनुमति पाउनेबित्तिकै उडाउनका लागि विमान तयारी हालतमा राखिएको भन्दै धैर्य गर्न आग्रह गरे ।

प्रचण्डभन्दा अघि बोलेका परराष्ट्रमन्त्री एनपी साउदले इजरायल दूतावासका कर्मचारी सहित सुरक्षाकर्मीबाट उद्धार हुने आश्वासन दिए ।

दूतावासले एनआरएन प्रतिनिधिसहित उद्धार पहल गरिरहेको उनले बताए ।

विपिनका अनुसार केही समयभित्र आफूहरुलाई तेल अबिब लैजान पहल भइरहेको दूतावासले बताएको छ । आफूहरु छिटोभन्दा छिटो उद्धारको पर्खाइमा रहेको उनले बताए ।

प्रधानमन्त्री प्रचण्ड र विपिनबीचको कुराकानी

प्रधानमन्त्री ः सुदूरपश्चिमको सबै विद्यार्थीहरुको नेतृत्व गरेको हो ?

विपिन सुवेदी ः हो हो हो ।

प्रधानमन्त्री ः यहाँ रमेशजी (प्रधानमन्त्रीका स्वकीय)सँग तपाईंको लगातार कुरा भइरहेको थाहा पाइरहेको छु ।

विपिन ःहजुर ।

प्रधानमन्त्री ः अहिले परराष्ट्रमन्त्रीसँग कुरा पनि भइ नै हाल्यो । हामी अस्तिदेखि नै लगातार लागिरहेका छौं । स्थिति एउटा विस्तारै अवस्थामा आइरहेको छ । यही विषयको लागि अहिले क्याबिनेटको बैठक पनि बोलाइएको छ । सर्वदलीय बैठक पनि बोलाइएको छ । इजरायली राजदूतावासमा पनि लगातार कुरा भइराखेको छ । सायद अहिले परराष्ट्र मन्त्री स्तरमा पनि कुरा होला ।

यो सबै कुरा तपाईंले त्यहाँ सबै विद्यार्थीहरुलाई कम्युनिकेट गरिदिनुपर्‍यो । ह्याभोक क्रियट गर्ने हुन्छन् ।

विपिन ःसबै जनालाई भन्दिइसकें ।

प्रधानमन्त्री ः अँ अँ ।

विपिन ःअहिलेको अवस्थामा एकजोर कपडा र पासपोर्ट व्यागमा हालेर रेडी भएर बस्नुस् । केयर गर्नुस् भनें । सबै जना रेडी हुनुहुन्छ ।

प्रधानमन्त्री ः थ्याङ्कु विपिनजी । रमेशजीसँग कम्युनिकेसनमा बस्नुस् ल ।

विपिन ः हामीलाई छिटोभन्दा छिटो नेपाल फर्काइदिनुस् ।

प्रधानमन्त्री ः ल ल । हामी त्यो तयारी गरिरहेका छौं । सक्रियताको साथ गरिराखेका छौं । ल हस् त ल ।