इजरायलले जस्तै प्यालेस्टाइनले पनि अल जजिरामाथि प्रतिबन्ध लगायो

अल जजिरा टेलिभिजन च्यानलमाथि प्यालेस्टाइनमा पनि अस्थायी प्रतिबन्ध लागेको छ। वेस्ट बैंकमा शासन गर्ने प्यालेस्टाइनी निकायले अल जजिरालाई राजद्रोह भड्काएको र आन्तरिक मामलामा हस्तक्षेप गरेको आरोप लगाएर प्रतिबन्धित गरेको हो।

सरकारले अल जजिरालाई तुरुन्तै स्थानीय कार्यालय बन्द गर्न र पत्रकारहरूको सबै काम रोक्न आदेश दिएको छ। यो प्रतिबन्ध तबसम्म कायम रहने बताइएको छ जबसम्म अल जजिराले आफ्नो हैसियत सुधार गर्दैन। तर, अल जजिराले कसरी स्थानीय कानुन उल्लंघन गर्‍यो भन्ने विषयमा स्पष्ट खुलाइएको छैन।

अल जजिराले प्यालेस्टिनी अथोरिटीको यो कदमको कडा आलोचना गरेको छ। बिहीबार जारी विज्ञप्तिमा उसले यो निर्णयलाई इजरायली कब्जाको शैलीसँग तुलना गर्दै प्रतिबन्ध तुरुन्त फिर्ता लिन आग्रह गरेको छ।

इजरायलले यसअघि मे २०२३ मा अल जजिरालाई “आतंककारी च्यानल” घोषणा गर्दै प्रतिबन्ध लगाएको थियो। त्यहाँ पारित कानुनले सरकारलाई विदेशी मिडिया कार्यालय बन्द गर्ने, उपकरण जफत गर्ने, तथा प्रसारण रोक्नका लागि पूर्ण अधिकार दिएको छ।

कतारमा आधारित अल जजिरा मध्यपूर्वको सबैभन्दा लोकप्रिय समाचार माध्यम हो। यसले आफूलाई आंशिक रूपमा सरकारी लगानीमा सञ्चालित स्वतन्त्र संस्था दाबी गर्दै आएको छ। तर, कतारमाथि शासनको प्रचार गर्न यो च्यानल सञ्चालन गरिएको आरोप इजरायल, साउदी अरेबिया, र संयुक्त अरब इमिरेट्सजस्ता देशहरूले लगाउँदै आएका छन्।

अक्टोबर ७ मा हमासद्वारा इजरायलमा भएको आक्रमणपछि इजरायली प्रतिकारमा अल जजिराका केही पत्रकार मारिएका छन्। इजरायलले ती पत्रकारहरूलाई हमाससँग सम्बन्धित भन्दै निशाना बनाएको दाबी गरेको छ।

प्यालेस्टिनी अथोरिटीले पनि इजरायलले जस्तै अल जजिरामाथि प्रतिबन्ध लगाएपछि यसको विश्वसनीयता र भूमिकामाथि प्रश्न उठ्न थालेका छन्। प्रतिबन्धको यो कदमले प्यालेस्टिनी अथोरिटी र अल जजिराबीचको सम्बन्ध थप जटिल बनाएको छ।