नेपाली राजदूतावास इजरायलमा नेपाल संवत् समावेश गरिनुका साथै राष्ट्रिय झन्डाको साथमा राष्ट्रिय गान बजाई कार्यालयको काम शुभारम्भ

नेपाल इजरायल डट कम
इजरायलस्थित नेपाली राजदूतावासले सेवा सुचारु गर्नु पूर्व अनिवार्य रूपमा राष्ट्रिय गानको धुन बजाएर कार्य सम्पादन आरम्भ गर्ने परम्पराको थालनी गरिएको छ।

नेपाली राजदूतावास, तेल अविवका कार्यवाहक राजदूत श्री कुमार बहादुर श्रेष्ठज्यूको अध्यक्षतामा बसेको दूतावासको मिति २०८१ असोज २१ गतेको बैठकले पारित गरे बमोजिम नेपाली राजदूतावास, तेल अविवले मिति २०८१ मङ्सिर ०२ गते आइतबारबाट दूतावासको कार्यालय समय ठिक ०९ बजे राष्ट्रिय झन्डाको साथमा “नेपालको राष्ट्रिय गान” बजाई कार्यालयको कामको शुभारम्भ गरिएको छ ।

विदेशस्थित नेपाली नियोगहरू अन्तर्गत यस राजदूतावास, तेल अविवद्वारा नेपाली टोपी लगाएर दूतावासका कर्मचारीहरूको उपस्थितिमा राष्ट्रिय गान बजाइएको थियो । पहिलो पटक कार्यालयको काम नेपालको राष्ट्रिय गान बजाएर सुरुवात गर्ने प्रचलन सर्वप्रथम यस राजदूतावासमा लागू गरिएको हो ।

इजरायलका लागि कार्यवाहक राजदूत कुमार बहादुर श्रेष्ठले यस्तो अभ्यासले कूटनीतिक नियोगका कर्मचारीहरूमा राष्ट्र प्रेमको भावना अभिवृद्धि गराउनुका साथै अनुशासन र सेवा भावको सकारात्मक सन्देश प्रवाह हुने बताउनु भयो । यसका साथै नेपाली दूतावास परिसरमा निरीक्षण गर्न या विविध कार्यक्रमको सिलसिलामा आइपुगेका अन्य देशका विदेशी प्रतिनिधिहरूलाई समेत नेपाल र नेपालीप्रति सम्मान वृद्धि हुने उहाँको विचार छ ।

यस राष्ट्रिय गानको सुरुवातसँगै नेपालको आफ्नै प्राचीन संवत् “नेपाल संवत्-११४५” लाई दूतावासको सरकारी कामकाजका चिठ्ठी पत्रहरूमा प्रयोग गर्ने गरी नेपाल सरकारबाट भएको निर्णय बमोजिम यस राजदूतावासले मिति २०८१ मङ्सिर ०२ गते आइतबारबाट सरकारी पत्राचार गर्दा अनिवार्य रूपमा नेपाल संवत् उल्लेख गर्ने कार्यको सुरुवात गरेको छ ।

विक्रम संवत् उल्लेख हुने आफ्ना सरकारी डकुमेन्ट, विज्ञप्ति लगायत पत्राचारका लागि प्रयोग हुने लेटर हेडसहितका सम्पूर्ण कागजातमा नेपाल संवत् समेत समावेश गर्ने निर्णय नेपाली दूतावास इजरायलले गरेको हो ।

नेपाली दूतावास इजरायलका कार्यवाहक राजदूत कुमार बहादुर श्रेष्ठका अनुसार सङ्घीय मन्त्री परिषद्ले अघिल्लो वर्षदेखि नै सरकारी कागजातमा विक्रम संवतसँगै नेपाल संवत् समेत उल्लेख गर्ने निर्णय गरेको भएता पनि व्यवहारिकता या विविध कारणले सम्पूर्ण कूटनीतिक नियोग तथा निकायहरूमा यसको अभ्यास भइसकेको थिएन ।

विगत लामो समयदेखि नेपाल संवत् नेपालको आफ्नै मौलिक संवत् भएकाले यसलाई सरकारी प्रयोजनमा ल्याउनुपर्ने माग हुँदै आएको थियो । नेपाली दूतावास इजरायलको यस निर्णयबाट अन्य देशका कूटनीतिक नियोगहरूमा पनि यस अभ्यासको सकारात्मक सन्देश जाने उहाँले बताउनु भयो ।

राष्ट्रिय गानलाई दैनिक बिहान कार्यालय समयमा बजाउने कार्यको प्रारम्भ गरिएको अवसर पारेर नेपाली राजदूतावास,तेल अविवले एक सार्वजनिक सूचना प्रेषित गर्दै इजरायलस्थित विभिन्न सहरहरूमा बसी रोजगार गर्दै आउनु भएका नेपाली दाजु भाइ / दिदी बैनीहरूलाई विशेष अनुरोध गर्दै आफ्नो आम्दानीलाई वैधानिक माध्यमबाट नेपाल पठाउन पनि अनुरोध गरिएको छ ।

साथै राजदूतावासले इजरायलमा रहेका नेपालीहरुमध्ये वैधानिक उपाय अवलम्बन गर्न प्रेरित गर्ने सामाजिक अगुवाहरूलाई कदर र प्रोत्साहन समेत गर्ने ब्यहोरा समेत उल्लेख गरेको छ । दूतावासमा आर्थिक लेनदेन विवाद, ठगी र अपराधका धेरै उजुरीहरू परेको हुँदा गलत माध्यमबाट पठाउँदा हुने जोखिमलाई कम गर्न वा निरुत्साहित पार्न इजरायलमा रहेका नेपालीहरूलाई वैधानिक वित्तीय माध्यमहरू प्रयोग गर्न दूतावासले एक विज्ञप्ति मार्फत अनुरोध गरेको हो ।

नेपाली राजदूतावास इजरायलले अप्ठेरोमा परेका नेपालीहरूको लागि तदारुकताका साथ तत्काल सेवा दिइरहेको अवगत गराउँदै नेपाल सरकारको ” समृद्ध नेपाल – सुखी नेपाली” को पवित्र नारालाई सफल पार्न यहाँ इजरायलस्थित सम्पूर्ण नेपाली दाजुभाइ दिदी बैनीहरूले यस अपिललाई सकारात्मक सोचका साथ ग्रहण गरी नागरिक दायित्व निर्वाह गर्न समेत अनुरोध गरेको छ ।