इजरायल र हमासबीचको वार्ता ९० प्रतिशत पूरा, युद्धविराम नजिक

काठमाडौं । गाजामा युद्धविराम र बन्धकहरूको रिहाइका लागि इजरायल र हमासबीचको वार्ता ९० प्रतिशत पूरा भएको छ। यो जानकारी एक वरिष्ठ प्यालेस्टिनी अधिकारीले दिएका हुन्।

दोहामा भइरहेको वार्तामा ठूला मुद्दामा भने अझै सहमति हुन बाँकी रहेको अधिकारीले बताएका छन्। उनले इजिप्टको सीमास्थित दक्षिणी गाजाको रणनीतिक रूपमा महत्त्वपूर्ण फिलाडेल्फिया कोरिडोरमा इजरायली सैन्य उपस्थिति मुख्य विवादको विषय रहेको बताए।

बीबीसीको रिपोर्टअनुसार, इजरायलले गाजाको सीमामा ठूलो बफर जोन बनाउन चाहेको छ र यस क्षेत्रमा आफ्नो सैन्य उपस्थिति कायम राख्ने योजना बनाइरहेको छ।

वार्ताले ठूला समस्याहरू समाधान गरेपछि केही दिनमै युद्धविरामको सहमति हुन सक्ने अधिकारीले जानकारी दिए। सहमति भएपछि तीन चरणमा कार्यान्वयन हुने योजना रहेको छ।

युद्धविरामको पहिलो चरणमा, रिहा गरिएका प्रत्येक इजरायली महिलाका लागि २० प्यालेस्टिनी कैदी आदानप्रदान गरिनेछ। बन्धकहरूलाई क्रमशः रिहा गरिनेछ, किनकि हमाससँग अझै केही बेपत्ता बन्धकहरूको जानकारी छैन।