ट्रम्पको हमासलाई कडा चेतावनी : म राष्ट्रपति बन्नु अघि नै बन्धक रिहा गर, नत्र गम्भीर परिणाम भोग्नुपर्ला

नेपाल इजरायल डट कम जेरुसलेम । अमेरिकाका नवनिर्वाचित राष्ट्रपति डोनाल्ड ट्रम्पले हमासलाई कडा चेतावनी दिएका छन्। द टाइम्स अफ इजरायल का अनुसार, ट्रम्पले हमासलाई इजरायली बन्धकहरूलाई तुरुन्तै रिहा गर्न आग्रह गर्दै, जनवरी २० भित्र यस्तो नगरे “गम्भीर परिणाम” सामना गर्नुपर्ने चेतावनी दिएका हुन्। जनवरी २०, २०२५ मा उनले आधिकारिक रूपमा अमेरिकी राष्ट्रपतिको कार्यभार सम्हाल्नेछन्।

ट्रम्पको यो आक्रामक भनाइ इजरायली प्रधानमन्त्री बेन्जामिन नेतान्याहुकी पत्नी सारा नेतान्याहुसँगको भेटपछि सार्वजनिक भएको हो। सारा आइतवार फ्लोरिडाको ट्रम्प अन्तर्राष्ट्रिय गल्फ कोर्समा ट्रम्पसँग भेट्न पुगेकी थिइन्। भेटघाटपछि डिनरको क्रममा गाजा युद्ध र बन्धकहरूको अवस्थाबारे गम्भीर छलफल भएको थियो।

गम्भीरताले भरिएको यो विषयको पृष्ठभूमि ७ अक्टोबर, २०२३ को दिनमा सुरु भएको हो। उक्त दिन हमासले इजरायलमा भएको आक्रमणमा १,२०८ इजरायली नागरिकको ज्यान गएको थियो। साथै, हमासले २५१ इजरायली नागरिकलाई बन्धक बनाएको थियो, जसमा हालसम्म ३५ जनाको मृत्यु भएको पुष्टि इजरायली सेनाले गरेको छ। अझै पनि ९७ जना बन्धक हमासको नियन्त्रणमा रहेको जनाइएको छ।

ट्रम्पको यो कडा चेतावनीले केवल अमेरिकी मात्र होइन, अन्तर्राष्ट्रिय मञ्चमा समेत चासो र बहसको विषय बनेको छ। अब हेर्न बाँकी छ, हमासले यो अल्टिमेटमलाई कत्तिको गम्भीरतापूर्वक लिन्छ।