हमासद्वारा बन्धक बनाइएका २० जनाको मृत्यु, सबैको हत्या गरिदिने धम्की

इजरायलले हमासविरुद्ध व्यापक हवाई तथा स्थल आक्रमण गरिरहँदा हमासले आफ्नो माग पूरा नभएको खण्डमा अपहरणमा परेका सबै बन्धकहरूको ज्यान लिने धम्की दिएको छ ।

गाजामा मानवीय सहायता बढाउनुपर्ने र प्यालेस्टाइनी कैदीहरूलाई छाड्नुपर्ने हमासको माग छ । यदि माग पूरा नभए बन्धकहरू जिउँदै घर नफर्किने हमासको चेतावनी छ । राष्ट्रसंघले पेस गरेको गाजामा युद्धविराम गर्नुपर्छ भन्ने प्रस्ताव अमेरिकाले भिटो प्रयोग गर्दै अस्वीकार गरेपछि हमासको यस्तो धम्की आएको हो ।

गत नोभेम्बरदेखि डिसेम्बर १ सम्म चलेको अस्थायी युद्धविराममा २४० प्यालेस्टाइनी कैदीको बदलामा हमासले १०५ बन्धकलाई छाडेको थियो । अझै १३७ बन्धकहरू हमासको नियन्त्रणमा छन् ।

इजरायली प्रधानमन्त्री बेन्जामिन नेतान्याहुको कार्यालयका अनुसार हिरासतमा रहेका १३७ बन्धकहरूमध्ये पनि २० जनाको भने मृत्यु भइसकेको छ । ती कुन–कुन देशका नागरिकहरू हुन् भनेरचाहिँ केही खुलाइएको छैन ।

हमासले इजरायलकै हवाई कारबाहीहरूमा बन्धकहरू मारिएको दाबी गर्ने गर्दछ । खबरअनुसार अक्टोबर ७ यता जारी युद्धमा गाजामा झण्डै १८ हजारले ज्यान गुमाएका छन्, जसमध्ये ११ हजार बालबालिका, महिला र वृद्धवृद्धा भएको बताइएको छ । इजरायलतर्फ भने १२ सयले ज्यान गुमाएका छन् ।

जारी युद्धमा हमासको सुरुङको सञ्जालले इजरायली सेनालाई चुनौती थपिदिएको विश्लेषण हुन थालेको छ । शक्तिशाली हतियार सम्पन्न इजरायलले हमासलाई सोचेअनुसार आक्रमण गर्न सकिरहेको छैन ।

यस्तोमा हमासलाई समाप्त गर्ने कसम खाएका नेतान्याहुले हमासको ५०० किलोमिटर लामो सुरुङको सञ्जालमा आफ्ना सेनालाई पठाउने कि नपठाउने भनेर निर्णय लिने बेला आएको छ ।

पूर्वब्रिटिस सैन्य खुफिया अधिकारी फिलिप इन्ग्रामका अनुसार इजरायली सेनाले सुरुङभित्र युद्ध गर्न जाँदा कैयौँ कठिनाइहरू भोग्नुपर्नेछ । इजरायललाई हमासको सुरुङ सञ्जालबारे थाहा नभएकाले त्यहाँ राखिएका धरापमा इजरायली सैनिक सहजै पर्न सक्छन् र उनीहरूले ज्यान गुमाउन सक्छन् ।

हमासले गरेको जटिल तयारी र सुरुङ सञ्जालमा उनीहरूको ज्ञानले इजरायली सेनालाई जोखिम निम्त्याउन सक्छ, यस कारण सुरुङ युद्धमा हमासले रणनीतिक फाइदा लिन सक्छ ।

यद्यपि नेतान्याहुको ‘हमासलाई नष्ट गर्ने’ प्रतिबद्धताका कारण पनि सुरुङहरूमा द्वन्द्वको सम्भावनालाई विज्ञहरू स्वीकार गर्छन् । नेतान्याहुमाथि हमासको आक्रमण रोक्न नसकेको, भ्रष्टाचार गरेकोलगायतका आरोपहरू लागि रहँदा उनीमाथि सत्तामै टिकिरहनका लागि हमासविरुद्ध जित निकालेर चाँडो परिणाम दिनुपर्ने दबाब छ ।

विभिन्न रिपोर्टहरूका अनुसार विषाक्त ग्यासको प्रयोग गरेर, साथै सुरुङहरूमा समुद्री पानी भरेर पनि इजरायलले हमासलाई बाहिर निकाल्ने प्रयास गर्न सक्छ ।