मानवीय सहायता कुरिरहेका प्यालेस्टाइनीको हत्या

इजरायल र प्यालेस्टाइनबीच जारी युद्ध अझै समाप्त भएको छैन। इजरायली सेनाले गाजामा लगातार कारबाही गरिरहेको छ । यसैबीच गाजाबाट एउटा हृदयविदारक घटना सार्वजनिक भएको छ ।

खाद्यान्न लिन यहाँ जम्मा भएको भीड इजरायली सेनाको गोलीको शिकार बनेका छन् । यस गोलीबारीमा १०४ जनाको मृत्यु भएको खुलासा भएको छ। प्यालेस्टिनी अधिकारीलाई उद्धृत गर्दै सीएनएन रिपोर्टका अनुसार यो घटना उत्तरी गाजामा भएको हो।

जानकारी अनुसार उत्तरी गाजामा इजरायली सेनाले गरेको गोलीबारीबाट १०४ जनाको ज्यान गएको छ भने सयौं घाइते भएका छन् । वास्तवमा प्यालेस्टिनीहरू रासन वितरण गर्ने ट्रकको अगाडि भेला भएका थिए। भोकभोकै मान्छेको भीड ट्रकको वरिपरि जम्मा भएको थियो, त्यहाँ अराजक वातावरण सिर्जना भयो। यसैबीच इजरायली सेनाले गोली चलाएको हो । जसका कारण भागदौड मच्चियो । गोलीबारीमा धेरैको मृत्यु भयो र धेरैलाई ट्रकले किचेर मरे।

यसैबीच, संयुक्त राष्ट्र प्रमुख गुटेरेसले गाजा सहायता स्थलमा भएको यो दुखद घटनाको कडा निन्दा गरेका छन्। संयुक्त राष्ट्रसंघका महासचिव एन्टोनियो गुटेरेसले घटनाको छानबिन गर्न माग गरेका छन् । गाजाको स्वास्थ्य मन्त्रालयले उक्त घटनामा १०० जनाभन्दा बढीको ज्यान गएको जनाएको छ ।

सीएनएन रिपोर्टका अनुसार भीड खानाको पर्खाइमा रहेको बेला इजरायली सेनाले कथित रूपमा गोली चलाउँदा १०० भन्दा बढी व्यक्तिको मृत्यु भएको थियो। गोलीबारी किन गरियो भन्ने सम्बन्धमा इजरायली सेना र प्रत्यक्षदर्शीको भनाइ एकदमै विरोधाभासपूर्ण छ ।

संयुक्त राष्ट्र प्रमुखका प्रवक्ता स्टेफेन डुजारिकले भने, “गाजाका निराश नागरिकहरूलाई तुरुन्तै मद्दतको आवश्यकता छ, जसमा उत्तरी क्षेत्रहरू पनि छन्, जहाँ संयुक्त राष्ट्रले एक हप्ता भन्दा बढी समयदेखि सहायता पुर्‍याउन सकेको छैन।” घटनाको समयमा संयुक्त राष्ट्र संघ उपस्थित नभए पनि दुखद घटनाको विस्तृत अनुसन्धान गर्न माग गरेको छ ।

यद्यपि इजरायलले समाचारको खण्डन गरेको छ ।