नेपाल प्रहरी को केन्द्रीय अनुसन्धान ब्युरोले ‘हाइपर फन्डको नाममा ठगी धन्दा सञ्चालन गरेको आरोपमा एक व्यक्तिलाई गिरफ्तार गरेको छ । सो धन्दामा संलग्न गिरोहहरू मध्ये ललितपुर इमाडोल बस्ने काजल घिमिरेलाई पक्राउ गरेर सिआइबिले अनुसन्धान अघि बढाएको हो । उनी वैदेशिक रोजगारीको सिलसिलामा इजरायलमा रही केही वर्ष अगाडी नेपाल फर्किएकी थिइन । पक्राउ परेकी घिमिरे सो धन्दाको नेपाल प्रमुख रहेको अनुसन्धानमा देखिएको छ।
केन्द्रीय अनुसन्धान ब्युरोका अनुसार बेलायत, इजरायल, पोर्चुगल लगायत खाडी देशहरूमा यो गिरोहको सञ्जाल सक्रिय रहेको छ । यो ठगी धन्दामा ५० भन्दा धेरैको प्रत्यक्ष सक्रियता रहेको छ भने २४ जना विरुद्ध जिल्ला अदालत काठमाडौँले पक्राउ पुर्जी जारी गरिसकेको छ ।
यो ठगी गिरोहको सञ्जाल अझ व्यापक हुनसक्ने अनुसन्धानले देखाएको छ । करिब ४० जनाले पाँच करोड रुपैयाँ ठगी भएको भनेर जाहेरी दिएको आधारमा अनुसन्धान अघि बढाइएको थियो ।
सिआइबीका निर्देशक प्रहरी अतिरिक्त महानिरीक्षक (एआइजी) श्यामलाल ज्ञवालीका अनुसार विभिन्न देशमा रहेका यस ठगी धन्दामा संलग्न गिरोहका नाइकेहरूले नेटवर्किङ शैलीमा व्यापक रूपमा सर्वसाधारणलाई ठगी गरेको पाइएको छ । उनीहरूले छोटो समयमै धेरै आम्दानी हुने प्रलोभन देखाएर विशेष गरी वैदेशिक रोजगारीमा रहेका नेपालीहरूलाई सङ्गठित रूपमा यस धन्दामा सहभागी गराउँदै आएका थिए ।
वैदेशिक रोजगारीमा भएकाहरु धेरै ठगीमा
वैदेशिक रोजगारीमा गएका नेपालीसँग धेरै पैसा उठाइएको छ। २० महिनाभित्र तेब्बर फिर्ता दिने आश्वासनसहित धेरैजसोलाई सुरुमा तीन सय अमेरिकी डलर लगानी गर्न लगाउने र सुरुमा थोरै फिर्ता समेत दिएर पछि धेरै रकम लगानी गर्न उक्साउने गरिन्छ । प्रहरीमा एकैजनाको एक करोड ३८ लाख रुपैयाँसम्म ठगी भएको उजुरी परेको छ, यस आधारमा ठगी रकम करोडौँमा हुन सक्ने अनुसन्धानमा संलग्न सिआइबीकी इन्स्पेक्टर जयन्ती थापा बताउँछिन् ।
अनुसन्धानमा आबद्ध प्रहरी अधिकारीले बताए अनुसार यो ठगी धन्दामा थप सदस्य बनाएमा आफ्नो आम्दानी बढ्दै जाने हुनाले संगठित रुपमा एकपछि अर्काेलाई पिरामिड शैलीमा फसाउदै लगिएको थियो । यसकारण संगठित कसुरमा समेत अनुसन्धान गर्न अनुमति दिएको सिआइबीकी इन्स्पेक्टर थापाले बताइन्। गिरोहका कतिपय नाइके गैरआवासीय नेपाली संघ लगायत विदेशमा रहेका नेपाली संघ संस्थामा समेत आबद्ध रहेको हुनाले वैदेशिक रोजगारीमा रहेका नेपालीलाई विश्वासमा पारेर ठगीको जाल फ़ैलाइएको पीडितले जनाएका छन् ।
हाइपर फन्ड या यस्तै प्रकृतिको ठगीबाट पिडित भएकालाई उजुरी गर्न केन्द्रिय अनुसन्धान विभागले आग्रह गरेको छ। सुरुमा हाइपरभर्स नाममा खोलिएको सो ठगी धन्दाको मुख्य कार्यालय अस्ट्रेलियामा रहेको र चिनियाँ मूलका अस्ट्रेलियन नागरिकलाई सो कम्पनीको प्रमुख भनेर चिनाइएको थियो। वेबसाइटमा पनि यस्तै विवरण राखिएको थियो।
‘हाइपर फन्ड’का नाममा धेरै समूहले पैसा उठाउँदै आएका छन्। यसको सूचना पाएपछि दुई वर्षअघि नै नेपाल राष्ट्र बैंक र सिआइबीले सूचना प्रकाशन गरी ‘हाइपर फन्ड’ अवैध भएकाले यसमा लगानी नगर्न सचेत गराएको पनि थियो।
नेपाल इजरायल डट कम - इजरायलमा रहेको नेपाली समुदायमा हुने विविध गतिविधि, सूचना र जानकारी पस्कने अनलाइन पत्रिका हो । info@nepalisrael.com
