एन आर एन एको आयोजनामा इजरायलमा हरितालिका तिज पर्व मनाइयो

इजरायल, २६ अगस्ट । गैर आवासीय नेपाली सङ्घ राष्ट्रिय समन्वय परिषद् इजरायल (एन आर एन इजरायल )को आयोजनामा नेपाली महिलाहरूको महान् चाड हरितालिका तिजको शुभकामना आदानप्रदान,दर खाने तथा विविध सांस्कृतिक कार्यक्रम तेल अभिभमा भव्य रूपमा मनाइएको छ। विगतका बर्सहरूमा मनाउँदै आएको हरितालिका तिज विशेष दर खाने कार्यक्रम यसपालि पनि २५ अगस्ट सोमबार इजरायलको तेल अभिभ स्थित लेभिन्स्की पार्कमा नाचगान सहित मनाइएको थियो ।

इजरायलस्थित नेपाली दूतावास इजरायलका महामहिम राजदूत प्रा. धनप्रसाद पण्डित प्रमुख अतिथिका रूपमा रहनु भएको सो कार्यक्रममा नेपाली दूतावास इजरायलका उपनियोग प्रमुख कुमार बहादुर श्रेष्ठ, आइसिसी सदस्य मुहम्मद अलि मियाका साथै इजरायलमा रहेका विभिन्न सङ्घ संथाका प्रतिनिधि, एन आर एन ए इजरायलका पदाधिकारी पूर्व पदाधिकारी लगायतका सामाजिक व्यक्तित्वहरूको आतिथ्यता रहेको थियो । कार्यक्रमको सभापतित्व एन आर एन ए इजरायलका अध्यक्ष गणेश गिरीले गर्नु भएको थियो ।

दीप प्रज्वलन र राष्ट्रिय गान बाट शुभारम्भ भएको कार्यक्रम संस्थाकी उपाध्यक्ष निर्मला बुढाथोकीले स्वागत मन्तव्य राख्नु भएको थियो । कार्यक्रममा इजरायलमा रहेका क्रियाशील विभिन्न सामाजिक, सङ्घ – संस्थाका प्रमुख लगायत, सम्पूर्ण नेपाली र नेपाली भाषी दिदीबहिनी तथा दाजुभाइहरूको उल्लेख्य उपस्थिति रहेको थियो । कार्यक्रममा थुप्रै तिज सम्बन्धित गीत, नृत्य,सामूहिक नाच लगायत अन्य साङ्गीतिक प्रस्तुतिहरू गरिएका थिए ।

इजरायलमा नेपाली महिलाहरूको महान् चाड तीजको सांस्कृतिक तथा धार्मिक महत्त्वलाई प्रवर्द्धन र संरक्षण गर्ने, एक आपसमा शुभकामना आदान – प्रदान गर्ने तीज विशेष सांस्कृतिक कार्यक्रम गर्नुका साथै भेटघाट, आपसी भाइचारा अभिवृद्धि गर्नुका साथै आपसमा सबैसँग सहयोग र सद्भाव कायम राख्ने उद्देश्यसहित आयोजना गरिएको कार्यक्रममा इजरायलमा कार्यरत दिदिबहिनीहरुले तीजको दर खादै हर्षोल्लासपूर्वक खुसीयाली मनाउनु भएको थियो ।

कार्यक्रमका प्रमुख अतिथि नेपाली दूतावास इजरायलका महामहिम राजदूत प्रा. धनप्रसाद पण्डितले घरदेखि टाढा प्रवासमा रहेर पनि यस्ता कार्यक्रमहरू गर्दै आएकोमा कार्यक्रमको प्रशंसा गर्दै एन आर एन गैर आवासीय नेपालीको विश्वव्यापी छाता सङ्गठन भएकोले सबैलाई समेटेर अघि बढ्नुपर्ने धारणा राख्नु भयो । तिज कार्यक्रमलाई सभ्य तथा भव्य रूपमा सफल पार्न सहयोग पुर्‍याउनु भएका विभिन्न ब्यक्तित्वहरुलाई हार्दिक धन्यवाद दिँदै कार्यक्रमका सभापति गणेश गिरीले आफ्नो घर परिवार माइती छोडेर वर्षौँ देखि विभिन्न पीडा समस्याहरू भोग्दै परिश्रम गर्दै आउनुभएको नेपाली चेलीबेटीहरूको प्रवास बसाइमा अलिकति खुसी थप्ने सानो प्रयास गरेको छौ भन्नु भयो। हुन त हामीले माइतीको सम्पूर्ण दायित्व पूरा गर्न नसकौला, तर चाडपर्वमा यसै गरी चेलीबेटीहरूको आँखामा आशु पुछ्दै ओठमा मुस्कान ल्याउने प्रयास जारी रहनेछ । कार्यक्रमको सहजीकरण तथा सञ्चालन संस्थाका महासचिव चित्र बहादुर कार्कीले गर्नु. भएको थियो ।