काठमाडौं,
इजरायलको Learn and Earn कार्यक्रम मार्फत व्यावसायिक कृषि तालिम लिइसकेका नेपाली युवाहरूले सम्माननिय प्रधानमन्त्री केपि शर्मा ओलि लाई खुला पत्र लेख्दै इजरायलमा पुनः रोजगारीका लागि आवश्यक सरकारी सहजीकरणका लागि पहल गर्न अनुरोध गरेका छन्। उनिहरुको पत्र यस प्रकार रहेको छ।
नेपाल सरकार
प्रधानमन्त्री तथा मन्त्रीपरिषद्को कार्यालय
सिंहदरबार, काठमाडौं
विषय: इजरायलको Learn and Earn कार्यक्रम अन्तर्गत पुनः पठाउन आवश्यक पहल सम्बन्धमा
सम्माननीय प्रधानमन्त्रीज्यू,
विनम्र अनुरोधसाथ अवगत गराउन चाहन्छौं कि हामी विगतमा इजरायल सरकारको Learn and Earn कार्यक्रम अन्तर्गत इजरायलका प्रतिष्ठित कृषि तालिम केन्द्रहरूमा ११ महिनासम्म अध्ययन तथा व्यावसायिक अभ्यास गरी फर्किएका नेपाली विद्यार्थीहरू हौं।
यस कार्यक्रमले हामीलाई आधुनिक कृषि प्रणाली, प्रविधि, उत्पादन अभिवृद्धि र व्यावसायिक जीवन सीपहरूमा दक्ष बनाएको थियो। साथै, आत्मनिर्भर बन्ने र नेपाल फर्किएपछि कृषिमा केही नयाँ गर्न सक्ने प्रेरणा र आत्मविश्वास प्राप्त भएको थियो।
हाल इजरायलमा कृषि कामदारहरूको अत्यधिक माग रहेको र विभिन्न देशहरूबाट सोही कार्यक्रमबाट प्रशिक्षित युवाहरूलाई इजरायली कम्पनीहरूले दीर्घकालीन रोजगारीको अवसर प्रदान गरिरहेका छन्। यसै क्रममा, हाम्रा पहिलेका रोजगारदाता कम्पनीहरूले हामीलाई पुनः ५ वर्षका लागि वर्क भिसा दिन इच्छुक रहेको जानकारी गराएका छन्।
तर दुर्भाग्यवश, नेपाल सरकारको आधिकारिक अनुमतिबिना हामीले त्यो अवसर लिन सक्ने अवस्था छैन।
अतः, यो परिस्थितिमा हामी, Learn and Earn कार्यक्रमका पूर्व सहभागीहरूपक्षबाट तपाईं समक्ष हार्दिक अनुरोध गर्न चाहन्छौं कि इजरायलमा पुनः कृषि क्षेत्रमा रोजगारीका लागि जान आवश्यक सरकारी सहजीकरण र अनुमतिको प्रक्रिया तुरुन्त अघि बढाइदिनुहुन अनुरोध गर्दछौं।
यो पहलले जहाँ एकातिर दक्ष जनशक्तिको उपयोगमार्फत इजरायलको कृषि क्षेत्रमा योगदान पुर्याउन सकिनेछ, अर्कोतर्फ नेपाल फर्किएपछि त्यही ज्ञान र अनुभवको प्रयोग गरी आफ्नै देशको कृषि क्षेत्रमा समेत नविन कार्य गर्न सकिनेछ।
हामी विश्वास गर्छौं कि नेपाल सरकार, विशेषतः तपाईंको अग्रसरतामा, नेपाली युवाको सीप, अनुभव र भविष्यका लागि मार्ग प्रशस्त गर्नु हुनेछ।
निवेदक,
लर्न एण्ड अर्नका विद्यार्थीहरू
