इजरायल र इरानबीच लामो समयदेखिको तनावपछि हालै स्थायी युद्धविराम कायम भएसँगै नेपाली नागरिकहरूका लागि यसअघि जारी गरिएको यात्रा advisory नेपाल सरकारले हटाएको छ। परराष्ट्र मन्त्रालयले जारी गरेको विज्ञप्तिमा भनिएको छ— “शान्ति प्रक्रिया अघि बढ्दै गएको र जनजीवन सामान्य अवस्थामा फर्कँदै गएको” जानकारीका आधारमा अब नेपाली नागरिकहरूले ती देशतर्फको यात्रा पूर्ववत रूपमा गर्न सक्नेछन्।
गत असार ४ गते (१८ जुन २०२५) इजरायल र इरानबीचको द्वन्द्वले चरम रूप लिन थालेपछि नेपाल सरकारले सुरक्षा संवेदनशीलता मूल्याङ्कन गर्दै नेपाली नागरिकहरूलाई ती मुलुकहरूको यात्रा नगर्न सुझाव दिएको थियो। सो advisory ले विशेषगरी वैदेशिक रोजगार, अध्ययन र भ्रमणका लागि ती देश जान चाहने नेपालीलाई सावधानी अपनाउन अनुरोध गरेको थियो।
तर, असार ९ गते (२३ जुन २०२५) देखि द्वन्द्वरत पक्षहरूबीच औपचारिक युद्धविराम कायम भएपछि इजरायल, इरान र समग्र मध्यपूर्व क्षेत्रमा अवस्था शान्तिपूर्ण बन्दै गएको छ। मन्त्रालयका अनुसार, स्थलगत रिपोर्टहरू तथा अन्तर्राष्ट्रिय सञ्चारमाध्यमहरूले समेत स्थिति सामान्य हुँदै गएको पुष्टि गरेका छन्।
यस सन्दर्भमा मन्त्रालयले पुनः यात्राको अनुमति दिँदै भनेको छ— “यो सूचना प्रकाशित भएको मितिबाट लागू हुने गरी सम्बन्धित मुलुकका अध्यागमन कानुन र प्रक्रियाको पालना गर्दै नेपाली नागरिकहरूले यथावत रूपमा यात्रा गर्न सक्नेछन्।”
परराष्ट्र मन्त्रालयले नेपाली नागरिकहरूलाई सम्बन्धित देशमा रहँदा आवश्यक सतर्कता अपनाउन, स्थानीय नियमहरूको पूर्ण पालना गर्न तथा आपत्कालीन अवस्थामा नजिकको नेपाली नियोग वा कूटनीतिक कार्यालयसँग सम्पर्क गर्न सुझाव दिएको छ।
