निराश मन लिएर विपिन जोशीकी आमा र बहिनी स्वदेश फर्किए

काठमाडौं । हमासद्वारा अपहरणमा परेका नेपाली विद्यार्थी विपिन जोशीको खोजीका क्रममा अमेरिका पुगेकी आमा पद्मा जोशी र बहिनी पुष्पा जोशी आज स्वदेश फर्किएका छन्। दुई वर्षअघिको असोज २१ गते (सन् २०२३ अक्टोबर ७) हमासको आक्रमणपछि बेपत्ता भएका विपिनको अवस्थाबारे थाहा पाउन र अन्तर्राष्ट्रिय समुदायको ध्यानाकर्षण गराउन उनीहरू अमेरिका पुगेका थिए।

तर लामो प्रतीक्षा र असंख्य प्रयासपछि पनि कुनै सकारात्मक समाचार नपाएपछि उनीहरू निराश मन लिएर स्वदेश फर्किन बाध्य भएका छन्।

गत महिना उनीहरु विपिन जोशीको खोजीका लागि इजरायलमा पनि आएका थिए । इजरायलका प्रधानमन्त्री लगायत राष्ट्रपति तथा सम्बद्ध अधिकारीहरु भेटेका थिए । बिपिन जोशीको फिर्ताको लागि सम्बद्ध पक्षहरु, संयुक्त राष्ट्रसंघ लगायत अन्तर्राष्ट्रिय समुदायलाई गरेको आग्रहलाई अन्तर्राष्ट्रिय संचार माध्यमहरुले प्राथमिकताका साथ प्रसारण गरेका थिए ।

इजरायल–हमास युद्धको समयमा बन्धक बनाइएका विपिनको अवस्थाबारे निरन्तर माग गर्दै आएका जोशी परिवारले अमेरिकामा संयुक्त राष्ट्रसंघ र मानवीय संस्थाहरूसँग भेटघाट गरेका थिए। तर शान्ति सम्झौता र युद्धविरामको घोषणा भएसँगै विपिनको अवस्थाबारे अन्ततः पुष्टि भएको थियो—उनी जीवित रहेनन्।

हमासले फर्काएका चार शवमध्ये विपिनको पनि शव इजरायलमा बुझाइएको इजरायली मिडियाले जनाएका छन्। अबु कबिर फरेन्सिक इन्स्टिच्युटमा गरिएको पोस्टमार्टम रिपोर्टअनुसार विपिनको हत्या सन् २०२३ को अन्त्यतिरै भएको अनुमान गरिएको छ।

आफ्नो छोरा र भाइको खोजीमा निःस्वार्थ हृदय लिएर यात्रा थालेका जोशी परिवारका लागि यो यात्रा केवल खोजी होइन, एक अमिट पीडाको अध्याय बन्यो। उनका आमा पद्मा र बहिनी पुष्पा अहिले पनि आशा र श्रद्धाबीचको तिक्त सत्यसँग सामना गरिरहेका छन्—विपिन फर्किएनन्, तर उनको साहस र समर्पणको कथा सधैं नेपाली हृदयमा बाँचिरहनेछ।