हमासको अपहरणमा परेका विपिन जोशीको खोजीका लागि आमा र बहिनी इजरायलमा

काठमाडौं – हमासद्वारा बन्धक बनाइएका नेपाली विद्यार्थी विपिन जोशीको खोजी र रिहाइको माग गर्दै उनकी आमा पदमा जोशी र बहिनी पुष्पा जोशी सोमबार बिहान इजरायल प्रस्थान गरेका छन्।

बिहान ९ बजे फ्लाइ दुबईको उडानमार्फत काठमाडौंबाट प्रस्थान गर्दा उनीहरूको आँखा अश्रुपूर्ण थिए। कञ्चनपुरका स्थायी वासिन्दा विपिन जोशी झन्डै २२ महिनाअघि हमास लडाकुहरूद्वारा इजरायलबाट बेपत्ता बनाइएका थिए। उनका बारेमा हालसम्म कुनै ठोस जानकारी प्राप्त भएको छैन।

विपिन २०८० असोज २० गते, कृषि विषयको ‘सिक्दै कमाउँदै’ कार्यक्रमअन्तर्गत इजरायलमै रहँदा, हमासको आक्रमणमा बेपत्ता भएका थिए। उनका साथीहरूको अनुसार, उनलाई हमासले बन्धक बनाएर लगेका थिए। सो घटनामा १० जना नेपाली विद्यार्थीले ज्यान गुमाएका थिए।

यसबीच संयुक्त राष्ट्रसंघमार्फत विपिनको रिहाइका लागि पहल भइरहेको छ। यही उद्देश्यसहित विपिनकी आमा र बहिनी इजरायल गएका हुन्। इजरायली पक्षले नै विपिनको परिवारलाई संयुक्त राष्ट्रसंघसमक्ष पु¥याएर अन्तर्राष्ट्रिय दबाब बढाउने रणनीति लिएको बताइएको छ।

यो पनि पढ्नुहोस
इजरायलमा नेपाली राजदूत पण्डित र ब्रिगेडियर जनरल हिर्सबीच उच्चस्तरीय भेटवार्ता

नेपालका लागि इजरायली राजदूत शमुलिक यारी बासले त्रिभुवन अन्तर्राष्ट्रिय विमानस्थलमै पुगेर विपिनकी आमा र बहिनीलाई बिदाइ गरेका थिए। उनका अनुसार, उनीहरूले इजरायलका उच्च राजनीतिक नेता, सरकारी अधिकारी र सेनाका प्रतिनिधिहरूसँग भेटवार्ता गर्नेछन्।

पदमा र पुष्पा इजरायलस्थित नेपाली दूतावासको सम्पर्कमा रहनेछन् र खोजीका बाँकी कार्य त्यहीँबाट अघि बढाइनेछ। दूतावासले नै उनीहरूको हवाई टिकटको व्यवस्था गरेको हो ।