काठमाडौं । अस्ट्रेलियाका प्रधानमन्त्री एन्थनी अल्बानिजले आफ्नो देशमा भएका कम्तीमा दुई यहुदीविरोधी आक्रमणलाई प्रत्यक्ष इरानसँग जोडेका छन्। उनले मंगलबार इरानले यी घटनामा प्रत्यक्ष निर्देशन दिएको ठहर गर्दै, अस्ट्रेलियास्थित इरानी राजदूतलाई तत्काल देश निकाला गर्ने निर्णय गरेको घोषणा गरेका हुन्।
प्रधानमन्त्री अल्बानिजले भने, “अस्ट्रेलियन सेक्रेट इन्टेलिजेन्स अर्गनाइजेशन (एएसआईओ) ले लामो समयदेखि संकलन गरेका गोप्य सूचनाले स्पष्ट देखाएको छ—यी हमलाहरू कुनै सामान्य घृणा गर्न लायक अपराध मात्र होइनन्, बरु बाह्य निर्देशन र नियोजनसहित गरिएका निन्दनीय गतिविधिहरू हुन् ।”
अस्ट्रेलियाली गुप्तचर संस्थाले सार्वजनिक गरेको जानकारीअनुसार, सिड्नीको एक रेस्टुरेन्टमा र मेलबर्नको एउटा मस्जिदमा गरिएका दुई फरक घटनामा अस्ट्रेलियास्थित इरानी दूतावासको प्रत्यक्ष संलग्नता रहेको प्रमाणित भएको छ ।
सिड्नीमा भएको घटनामा यहुदी समुदायलाई लक्षित गरिएको थियो। अर्को मेलबर्नको इस्लामिक मस्जिदमा भएको आक्रमणले धार्मिक सौहार्दमा आघात पुर्याउने हेतुले नियोजित रुपमा षड्यन्त्र गरिएको प्रष्ट भएको थियो ।
यी घटनाहरू इजरायल–हमास युद्ध सुरु भएपछि अस्ट्रेलियाभर फैलिएको यहुदीविरोधी गतिविधिको बढ्दो लहरसँग जोडिएका छन्। युद्ध सुरु भएपछि अस्ट्रेलियाको मुख्य सहरहरूमा यहुदी समुदायमाथि आक्रमण, धम्की र घृणासूचक गतिविधि बढेको तथ्यांकले देखाएको छ।
प्रधानमन्त्री अल्बानिजले एएसआईओको निष्कर्षलाई उद्धृत गर्दै भने, “एएसआईओले पर्याप्त प्रमाणहरू संकलन गरिसकेको छ जसले देखाउँछ—यी घटनामध्ये कम्तीमा दुईवटा इरानी सरकारी निकाय वा तिनका प्रतिनिधिको निर्देशनमा सम्पन्न गरिएका हुन्। इरानले आफ्नो संलग्नता लुकाउने प्रयास गरिरहेको छ , तर अस्ट्रेलियन गुप्तचर मूल्यांकनले यसको पर्दाफास गरिसकेको छ।”
यस घटनाले अस्ट्रेलियाको विदेश नीतिमा महत्वपूर्ण सन्देश दिएको छ—त्यहाँ कुनै पनि प्रकारको बाह्य हस्तक्षेप, आतङ्क फैलाउने प्रयास वा धार्मिक समूहहरूबीच तनाव भड्काउने गतिविधि सह्य हुनेछैन। इरानी राजदूतलाई निष्कासन गर्नु अस्ट्रेलियाले आफ्नो सार्वभौम अखण्डता र सामाजिक सौहार्दमा आघात पुर्याउने तत्वहरूसँग लड्न कठोर कदम चाल्ने संकेत हो।
नेपाल इजरायल डट कम - इजरायलमा रहेको नेपाली समुदायमा हुने विविध गतिविधि, सूचना र जानकारी पस्कने अनलाइन पत्रिका हो । info@nepalisrael.com
