वासिङ्टन । इजरायलमा प्यालेस्टिनी अतिवादी समूह हमासले सांघतिक हमला गरेपछि शुरु भएको इजरायल प्यालेस्टाइन युद्ध अझ भयानक हुने संकेत देखिएको छ । शुक्रबार इजरायली सेनाले उत्तरी गाजाबाट १० लाखभन्दा बढी मानिसलाई सुरक्षित स्थानमा सार्न निर्देशन दिएपछि यसलाई अमेरिकाले ‘कठिन’ आदेश भएको जनाएको छ ।
राष्ट्रिय सुरक्षा परिषद्का प्रवक्ता जोन किर्बीले सीएनएनसँग भने, “इजरायलीहरुले के गर्न खोजेका छन् भन्ने कुरा सबैले बुझेको कुरा हो । उनीहरूले आम सर्वसाधारणलाई हानी हुनबाट जोगाउन खोजिरहेका छन् ।”
“यो एक आवश्यक तर पालना गर्न निकै कठिन आदेश हो । उत्तरी गाजामा १० लाख मान्छे छन्, र यो धेरै घना शहरी वस्ती हो । साथै, यो पहिले नै एक युद्ध क्षेत्र पनि हो । त्यसैले कसैले पनि त्यो निकासीलाई प्रभाव पार्ने चुनौतीलाई कम आँकिरहेको छ जस्तो मलाई लाग्दैन ।”
शुक्रबार राति इजरायलका प्रधानमन्त्री बन्यामिन नेत्यान्याहुले राष्ट्रका नाममा सम्बोधन गरेका छन । उनले हाम्रो युद्ध भर्खर शुरु मात्र भएको भन्दै आफूहरु गाजामा केन्द्र बनाएर आक्रमण गरि रहेका हमास र उसको आतंकलाई परास्त गरेरै छोड्ने र बन्धक बनाएर लगेका आफ्ना नागरिकहरुलाई फर्काउने प्रतिबद्धता गरे ।
विपक्षी पार्टीका नेताले भने प्रधानमन्त्रीको उक्त सम्बोधनमा खासै नया कुरा केही नभएको र उनको यो कदमले सव्वातको समयमा आम इजरायलवासीमा सुरक्षाको प्रत्याभुति दिनुको सट्टा उल्टो त्रास मात्रै फैलाएको आरोप लगाएका छन । इजरायलमा शुक्रबार र शनिबार “सब्बात” को विदा हुन्छ ।
धार्मिक महत्वका यी दिनहरु अति आवश्यक कार्य बाहेक पूजा आजा र छुट्टी मनाइने यो समयमा राति राति सम्बोधन गर्नु डर र त्रास फैलाउनु बाहेक केही होइन – विपक्षी पार्टीका नेता यायर लापिडले भने ।
गाजामा ‘दोस्रो विपत्ति’ आउने चेतावनी
प्यालेस्टिनी राष्ट्रपति महमुद अब्बासले इजरायली सेनाले उत्तरी गाजामा १० लाखभन्दा बढी मानिसलाई सुरक्षित स्थानमा सार्न आदेश दिएपछि प्यालेस्टिनीहरूले सामना गर्नुपरेको ‘दोस्रो नक्बा’ (विपत्ति) को सामना गर्न सक्ने चेतावनी दिएका छन् ।
“गाजा पट्टीबाट प्यालेष्टिनी नागरिकको विस्थापनलाई पूर्ण रूपमा अस्वीकार गर्दै वस्ती खाली गर्नु प्यालेष्टिनी नागरिकको लागि दोस्रो नक्बा जस्तै हुनेछ,” अब्बासले भने ।
सन् १९४८ मा इजरायलको स्थापनासँगै भएको युद्धको दौडान भागेका वा घरबाट निष्कासित गरिएका लगभग सात लाख ६० हजार प्यालेस्टिनीहरूको दुःखलाई ‘पहिलो नक्बा’का रूपमा उनीहरूले लिने गर्छन् ।
इजरायली सेनाले गाजापट्टीमा करिब ११ लाख मानिसको बसोबास रहेको उत्तरबाट भाग्न चेतावनी दिँदै पर्चा खसालेपछि उहाँले यस्तो टिप्पणी गरेका हुन् ।
अब्बासको प्यालेस्टिनी केन्द्रीय प्रशासन कब्जा गरिएको पश्चिम किनाराको रामल्लाहमा बसेको छ र गाजामा शासन गर्ने लडाकू समूह हमासबाट विभाजित छ ।
इजरायली सेनाले शनिबारदेखि गाजामा हजारौं हवाई आक्रमण गरेको छ जसमा एक हजार ५३० भन्दा बढी व्यक्तिको मृत्यु भएको प्यालेस्टिनी स्वास्थ्य मन्त्रालयले जनाएको छ ।
इजरायली सेनाका अनुसार हमासका लडाकूहरूले सीमापार गरेको आक्रमणमा एक हजार ३०० भन्दा बढीको मृत्यु भएपछि यो आक्रमण गरिएको हो ।
जबर्जस्ती स्थानान्तरण ‘अपराध’
अरब लिगले इजरायलले प्यालेस्टाइनलाई प्रतिबन्धित गाजा पट्टीको उत्तरतर्फको क्षेत्र खाली गर्न दिएको आदेशलाई ‘जबर्जस्ती स्थानान्तरण’ को संज्ञा दिएको छ ।
“‘जबर्जस्ती स्थानान्तरण’ गर्नु एउटा ठूलो ‘अपराध’ हो,” अरब लिगका प्रमुख अहमद अबुल घेइतले शुक्रबार बताएका छन् ।
संयुक्त राष्ट्रसङ्घका महासचिव एन्टोनियो गुटेरेसलाई पठाएको पत्रमा अरब लिगले इजरायलले प्रतिशोधको नृशंस कार्य गरेको आरोप पनि लगाइएको छ ।
इजरायली भूमिमा हमासका लडाकूहरूले गरेको घातक आक्रमणलाई अन्त्य गर्ने ‘योजनाबद्ध वा अध्ययन गरिएको सैन्य अभियान’ को सट्टा गाजामा असहाय नागरिकलाई सजाय दिइएको पत्रमा उल्लेख छ ।
नेपाल इजरायल डट कम - इजरायलमा रहेको नेपाली समुदायमा हुने विविध गतिविधि, सूचना र जानकारी पस्कने अनलाइन पत्रिका हो । info@nepalisrael.com
