पहिलो नेपाली मिडियाका रुपमा कान्तिपुर टिम युद्धग्रस्त इजरायलमा

काठमाडौं । पहिलो नेपाली मिडियाका रुपमा कान्तिपुर टिमका तीन जना सहकर्मी युद्धग्रस्त इजरायलमा रिपोर्टिङका लागि पुगेका छन् ।

कान्तिपुर टेलिभिजनका श्याम श्रेष्ठ, कान्तिपुर दैनिकका होम कार्की र प्रकाशचन्द्र तिमिल्सेना इजरायलमा भइरहेको युद्धको रिपोर्टिङका लागि पुगेका हुन् ।

आजै इजरायल सरकारले नेपाली दूतावास मार्फत् कसैलाई पनि घर बाहिर ननिस्किन भनेको छ । अहिले पनि निरन्तर जस्तो आक्रमण भइरहेको र सचेतका लागि साइरन बजिरहेको दृष्य हाम्रा सहकर्मीहरुले पठाएका छन् ।

इजरायलस्थित नेपाली राजदूत कान्ता रिजालका अनुसार इजरायल सरकारको उच्चस्तरबाटै घर बाहिर ननिस्किन आएको निर्देशन नेपालीहरुलाई जानकारी गराइएको छ । राजदूत रिजालले त्यहाँको सरकारले बाहिर ननिस्किन निर्देशन दिएअनुसार इजरायलमा रहेको ३५ नेपालीसम्बन्धित संस्थामार्फत् सचेत गराइएको जानकारी दिइन् ।

उनले आजै ८० जना नेपालीसँग आफूले कुराकानी गरेको बताइन् । हाल इजरायलमा रहेका ४५ सय नेपाली दूतावासको सम्पर्कमा रहेको पनि राजदूत रिजालले जानकारी दिएकी छन् ।

त्यस्तै हमासको आक्रमणमा परेर मारिएका १० नेपालीको शव पहिचान गरेर नेपाल पठाउन इजरायली सरकारसँग आग्रह गरिरहेको उनले जानकारी दिएकी छन । मृतकको शव पहिचान गरेर नेपाल पठाउन इजरायलको विदेश मन्त्रालयका अधिकृतहरुसँगै समन्वय गरेर सम्भव भएसम्म छिटो पठाउन पहल भइरहेको उनले बताइन् ।

सरकारले इजरायलबाट २ सय ५४ नेपालीलाई उद्धार गरेर स्वदेश ल्याइसकेको छ ।