इजरायलबाट गड्डाचौकी नाका हुँदै स्वदेश फर्किए ७ नेपाली नागरिक

द्वन्द्वग्रस्त इजरायलबाट उद्धार गरिएका ७ जना नेपालीले पश्चिम सीमानाका गड्डाचौकी भएर स्वदेशमा पाइला टेकेका छन्।

सरकारले दोस्रो चरणमा उद्धार गरेका १८ जनामध्ये ७ जना बुधबार बिहान गड्डाचौकी पुगेका हुन्। भारत सरकारले आफ्ना नागरिकसँगै १८ नेपालीलाई पनि विमानमार्फत दिल्ली ल्याइदिएको हो।

जिल्ला प्रहरी कार्यालय कञ्चनपुरका एसपी कमल थापाले गड्डाचौकी भएर स्वदेश पुगेका ७ जनालाई गन्तव्यमा पुर्‍याउने तयारी भइरहेको छ।

१८ जनामध्ये कोही प्लेनमा घरतिर गएछन्, कोहीले भारतमै परिवारका सदस्यसँग भेटेका छन्, उनले भने, ७ जना गाडीमार्फत महेन्द्रनगर पुगेका छन्, उहाँहरुलाई घरसम्म पुर्‍याउने तयारी गर्दै छौँ।

उनका अनुसार कैलालीको टिकापुरका नन्दसिंह भुल, काठमाडौँका राजकुमार मानन्धर , ममता थापा, दिलकुमारी अधिकारी कार्की, श्रीता गुरुङ, लक्षमण दुलाल र मोरङका निश्चल श्रेष्ठ गड्डाचौकी नाका भएर महेन्द्रनगर पुगेका हुन्।

काठमाडौँका मानिसलाई प्लेनमार्फत पठाउने तयारी भइरहेको प्रहरीले जनाएको छ।

स्वदेश फर्किन पाउँदा निकै खुसी लागेको काठमाडौँको टोखा-८ की स्रीता गुरुङले बताइन्। उनी १४ वर्षदेखि इजरायलमा बस्थिन्।

अहिलेको जस्तो तहसनहस हुने घटना कहिल्यै भएको थिएन, सानो सानो भइरहेको हुन्थ्यो, उनले भनिन्, घटनापछि डर लाग्यो, सुरक्षित महसुस गर्न सकिएन, त्यसैले स्वदेश फर्कियौं, निकै खुसी लागेको छ।

पहिलो चरणमा सरकारले नेपाल वायु सेवा निगमको जहाजमार्फत इजरायलबाट २५४ नेपाली ल्याइसकेको छ। १० नेपाली विद्यार्थी भने हमासको अमानवीय आक्रमणमा परी सधैंका लागि अस्ताए ।