बन्धकको उद्धार गर्न गएको इजरायली सेनाकै गोलीबाट - गल्तीले तीन बन्धक मारिए’‘

तेल अभिभ । इजरायली सेनाले गाजामा जारी आफ्नो सैन्य कारबाहीमा गल्तीले तीनजना बन्धक मारिएको जानकारी दिएको छ । अक्टोबर ७तारिख हमासले इजरायलबाट अपहरण गरेर लगेका बन्धकहरुमध्ये २८ वर्षीय योताम हाइम, २२ वर्षीय समिर तलाल्का र २६ वर्षीय अलोन सामरिज मारिएका छन् ।

उत्तरी गाजाको सेजाइयामा गरिएको सैन्य कारबाहीका दौरान उनीहरू मारिएको सेनाको भनाई छ । गत ७ अक्टोबरमा हमासले इजरायलमा गरेको आक्रमणपछि गाजामा अझै १ सयभन्दा बढी बन्धक रहेका छन् । सो दिनको हमलामा २ सय ४० जनाभन्दा बढीलाई बन्धक बनाइएको भए पनि दुई पक्षबिच केही समयका लागि गरिएको अस्थायी युद्धविरामका दौरान केही बन्धकहरूलाई छाडिएको थियो । नेपालका विपिन जोशी पनि प्यालेस्टिनी उग्रवादी हमासको सो अपहरणमा परेका थिए ।

इजरायली रक्षा बल (आईडीएफ) ले घटनाप्रति दुःख व्यक्त गर्दै यसबारे अनुसन्धान भइरहेको जनाएको छ । यस घटनामा मारिएका परिवारप्रति आईडीएफले समवेदना प्रकट गरेको छ । ‘हाम्रो मिसन भनेको बन्धकहरूको स्थान पहिचान गर्नु र उनीहरूलाई छुटाएर घर फिर्ता ल्याउनु हो,’ सेनाले भनेको छ । मारिएका तीन जनाको शव इजरायल फिर्ता ल्याइएको छ ।

गाजास्थित हमासको स्वास्थ्य मन्त्रालयले इजरायली सेनाको कारबाहीमा हालसम्म १८ हजार ८ सय जनाको मृत्यु भएको छ भने ५० हजारभन्दा बढी घाइते भएका छन् । प्यालेस्टिनी चरमपन्थी समूह हमासले अक्टोबर ७ मा इजरायलमा चाड मनाइरहेको समयमा अप्रत्यासित हमला गरेपछि इजरायल र गाजामा युद्ध चलिरहेको छ । अक्टोबर ७मा भएको सो आक्रमणमा १० नेपाली मारिएका थिए ।