उच्च रक्तचापका कारण मस्तिष्काघात भै इजरायलमा एक नेपाली केयरगिभरको दुखद निधन

जेरुसेलम इजरायल । नेपालको चितवन जिल्ला आपटारी स्थायी घर भई हाल रोजगारीको सिलसिलामा इजरायलमा रहनुभएकी एक नेपाली कामदारको असामयिक निधन भएको छ ।

विगत लामो समयदेखि इजरायलमा वृद्धवुद्धाहरुको स्याहार (केयरगिभर ) गर्दै आउनुभएकी विष्णुमाया रिमालको इजरायलको नेतानियास्थित लेनियादो अस्पतालमा उपचारको क्रममा ११ तारीख निधन भएको हो । उहालाई उच्च रक्तचापको समस्या रहेको बुझिएको छ । उहा कार्यरत स्थानमा उच्च रक्तचापकै कारण मस्तिष्क आघात हुन गई अचेत अवस्थामा ढल्नु भएको अवस्थामा अस्पताल पुर्याइएको थियो ।

इजरायलमा विगत १५ बर्षदेखि रहनुभएकी विष्णुमाया रिलिभर गर्दै आउनुभएको थियो । यही महिना उहाले इजरायलको वसाईलाई समाप्त गरी नेपाल फर्कने तयारी समेत गर्नु भएको थियो । उहाँले यही जनवरी २२ तारीख फिर्ती हवाई टिकट लिनुभएको बुझिएको छ तर प्रस्थानको मिति अगावै यसरी असामयिक हुनपुगेको दुखद घटनाबाट इजरायलवासी नेपाली मर्माहत बनेका छौं ।