काठमाडौं । इजरायलमा केयरगिभरको रोजगारी दिलाइदिने भन्दै १५६ जनाबाट २ करोड ५० लाख रुपैयाँभन्दा बढी रकम ठगी गरेको आरोपमा पक्राउ परेका रामेछापका कांग्रेस नेता भरत चौलागाईंमाथिको अनुसन्धानमा थप विवरण सार्वजनिक भएका छन्। प्रहरी अनुसन्धानमा उनले इजरायल जान इच्छुक व्यक्तिहरूबाट रकम उठाउन पत्रकार बालिका शिवाकोटीलाई प्रयोग गरेको र संकलित रकमको व्यवस्थापन प्रेमिकामार्फत गरेको आरोप सार्वजनिक भएको छ।
प्रहरीको केन्द्रीय अनुसन्धान ब्युरो (सीआईबी) स्रोतका अनुसार चौलागाईं र शिवाकोटी पक्राउ परेपछि यस प्रकरणमा ठगीमा परेको दाबी गर्ने अन्य व्यक्तिहरू पनि प्रहरीको सम्पर्कमा आउन थालेका छन्। नेपाली कांग्रेसका केन्द्रीय तहका केही नेताले समेत आफूहरू ठगीमा परेको मौखिक जानकारी गराएको प्रहरी स्रोतको दाबी छ।
प्रहरीले घटनामा संलग्न व्यक्तिहरूको भूमिका, रकम संकलन तथा हस्तान्तरणको प्रक्रिया र इजरायल पठाइदिने नाममा प्रयोग गरिएका कागजातबारे अनुसन्धान गरिरहेको जनाएको छ।
इजरायलमा रोजगारी दिलाउने भन्दै प्रतिव्यक्ति ६ लाख २० हजार रुपैयाँ उठाएको आरोप
नेपाल सरकार र इजरायल सरकारबीच भएको सरकारीस्तरको सम्झौता (जीटुजी) प्रक्रियाअन्तर्गत केयरगिभरका रूपमा इजरायल जाने कामदार छनोट गरिएको थियो। उक्त प्रक्रियामा छनोट हुन नसकेका व्यक्तिहरूलाई समेत इजरायल पठाइदिने आश्वासन दिएर रकम उठाइएको आरोप छ।
प्रहरी स्रोतका अनुसार इजरायल जाने छनोट प्रक्रियामा पर्न नसकेका १५६ जनासँग प्रतिव्यक्ति ६ लाख २० हजार रुपैयाँका दरले रकम संकलन गरिएको थियो। आरोपितहरूले मन्त्रिपरिषद्बाट विशेष निर्णय गराएर इजरायल पठाइदिने भन्दै रकम उठाएको बताइएको छ।
प्रधानमन्त्रीको सचिवालयका व्यक्तिहरूलाई रकम बुझाउनुपर्ने भन्दै उम्मेदवारहरूलाई विश्वास दिलाइएको आरोपसमेत छ। प्रतिव्यक्ति पाँच लाख रुपैयाँ प्रधानमन्त्रीको सचिवालयका व्यक्तिलाई बुझाउनुपर्ने भनिएको र सोही आधारमा ६ लाख २० हजार रुपैयाँका दरले रकम उठाइएको प्रहरी अनुसन्धानबाट खुलेको विवरणमा उल्लेख छ।
यद्यपि, प्रधानमन्त्रीको सचिवालयका कुनै व्यक्तिले वास्तवमै रकम लिएका थिए वा थिएनन् भन्ने विषयमा अनुसन्धानबाट पुष्टि हुन बाँकी छ।
पैसा उठाउने जिम्मा पत्रकार बालिका शिवाकोटीलाई दिएको आरोप
प्रहरी अनुसन्धानअनुसार चौलागाईंले इजरायल जान चाहने व्यक्तिहरूसँग सम्पर्क गरी रकम संकलन गर्ने जिम्मा पत्रकार बालिका शिवाकोटीलाई दिएको आरोप छ।
शिवाकोटीका आफन्तसमेत इजरायल जानका लागि रकम बुझाउने व्यक्तिहरूमध्ये रहेको बताइएको छ। आफ्नो आफन्तलाई इजरायल पठाउने उपाय खोज्ने क्रममा चौलागाईंसँग भेट भएको शिवाकोटीले प्रहरीलाई बताएको स्रोतको भनाइ छ।
चौलागाईंले मन्त्रिपरिषद्बाट विशेष निर्णय गराएर इजरायल पठाउन सकिने र त्यसका लागि प्रधानमन्त्रीको सचिवालयका व्यक्तिहरूसँग नियमित कुराकानी भइरहेको दाबी गरेको शिवाकोटीको भनाइ रहेको बताइएको छ।
यही आश्वासनका आधारमा शिवाकोटीले इजरायल जान इच्छुक व्यक्तिहरूसँग रकम संकलन गरेको आरोप छ। प्रहरीले यस प्रकरणमा शिवाकोटीको भूमिका, रकम संकलनको उद्देश्य र अन्य व्यक्तिसँगको सम्बन्धबारे अनुसन्धान गरिरहेको छ।
मन्त्रिपरिषद्को निर्णयसम्बन्धी कागजात नक्कली
यस ठगी प्रकरणमा मन्त्रिपरिषद्को निर्णयसँग सम्बन्धित भनिएको एउटा कागजात पनि चर्चामा आएको छ।
अनुसन्धानमा संलग्न प्रहरी स्रोतका अनुसार चौलागाईंले मन्त्रिपरिषद्को बैठकमा पेस गर्न तयार पारिएको टिप्पणीको एक प्रति आफूसँग रहेको भन्दै शिवाकोटीलाई देखाएका थिए। उक्त कागजात देखाएर शिवाकोटीले इजरायल जान इच्छुक व्यक्तिहरूलाई विश्वास दिलाएको र उनीहरूबाट रकम उठाएको आरोप छ।
तर, प्रहरीले उक्त कागजात नक्कली रहेको जनाएको छ। कागजातको प्रयोग गरेर रोजगारीको आश्वासन दिइएको हो वा होइन भन्ने विषयलाई पनि अनुसन्धानको महत्त्वपूर्ण पाटोका रूपमा हेरिएको छ।
प्रहरी स्रोतका अनुसार शिवाकोटीले आफ्नो आफन्तलाई इजरायल पठाउन सकिने र यसबाट आफूलाई पनि आर्थिक लाभ हुने आशामा रकम संकलन गरेको बयान दिएकी छन्। यद्यपि, यस विषयमा अनुसन्धानको पूर्ण विवरण सार्वजनिक हुन बाँकी छ।
रकम फिर्ता माग्दा नक्कली कागजात देखाएर टार्ने गरेको आरोप
यस प्रकरणमा रकम बुझाएका व्यक्तिहरूमध्ये करिब ४० जनाले केही सातादेखि शिवाकोटीसँग आफ्नो पैसा फिर्ता मागिरहेको बताइएको छ।
रकम फिर्ता माग्दा मन्त्रिपरिषद्को बैठकमा पेस गर्न तयार पारिएको भनिएको कागजात देखाएर शिवाकोटीले उनीहरूलाई टार्ने गरेको पीडितहरूको आरोप रहेको प्रहरी स्रोतले जनाएको छ।
पीडितहरूले उक्त कागजात नक्कली भएको भन्दै रकम फिर्ता माग्न थालेपछि विवाद थप बढेको बताइएको छ।
स्रोतका अनुसार रकम फिर्ता नपाएपछि केही पीडितले शिवाकोटीलाई नियन्त्रणमा राखेर पैसा फिर्ता मागेका थिए। उनी केही दिन काठमाडौं उपत्यकाभित्रका विभिन्न होटल तथा रिसोर्टमा पीडितहरूसँगै बसेको विवरणसमेत सार्वजनिक भएको छ।
पीडितहरूले दबाब दिएपछि चौलागाईंले रकम लिएको विषयमा शिवाकोटीले जानकारी गराएको बताइएको छ। तर, चौलागाईंले भने आफूले रकम लिएको स्वीकार नगरेको प्रहरी स्रोतको भनाइ छ।
चौलागाईंले रकम बुझाउने व्यक्तिहरूलाई आफूले पैसा नलिएको र जसलाई रकम दिएको हो, उसैसँग फिर्ता माग्नुपर्ने जवाफ दिएको बताइएको छ।
संकलित रकम प्रेमिकामार्फत व्यवस्थापन गरेको आशंका
प्रहरी अनुसन्धानमा चौलागाईंले संकलित रकमको व्यवस्थापन आफ्नी प्रेमिकामार्फत गरेको आशंका गरिएको छ। उनकी प्रेमिका पनि राजनीतिमा संलग्न रहेको प्रहरी स्रोतलाई उद्धृत गर्दै सार्वजनिक विवरणमा उल्लेख छ।
तर, रकम कहाँ राखिएको थियो, कसकसको खातामा पठाइएको थियो र रकमको अन्तिम प्रयोग कसरी भयो भन्ने विषयमा विस्तृत विवरण सार्वजनिक भएको छैन।
प्रहरीले रकम संकलन, हस्तान्तरण र बाँडफाँटमा संलग्न हुन सक्ने व्यक्तिहरूको भूमिका पहिचान गर्ने प्रयास गरिरहेको बताइएको छ। रकम व्यवस्थापनमा अन्य व्यक्ति संलग्न थिए वा थिएनन् भन्ने विषय पनि अनुसन्धानबाट स्पष्ट हुन बाँकी छ।
कांग्रेसका अन्य नेताहरू पनि ठगीमा परेको र संलग्न रहेको हुनसक्ने
प्रहरी स्रोतका अनुसार यस प्रकरणमा नेपाली कांग्रेसका केन्द्रीय तहका केही नेताहरूले समेत आफूहरू ठगीमा परेको भन्दै मौखिक जानकारी गराएका छन्। यद्यपि, मौखिक जानकारीका आधारमा मात्रै ती व्यक्तिहरू ठगीमा परेको वा आरोपितहरूको संलग्नता पुष्टि भएको मान्न मिल्दैन।
उनीहरूले लिखित जाहेरी दिने तयारी गरिरहेको बताइएको छ। लिखित उजुरी परेपछि उनीहरूले कति रकम बुझाएका थिए र घटनामा कसको भूमिका थियो भन्ने विषयमा थप अनुसन्धान भइरहेको छ।
नेपाल इजरायल डट कम - इजरायलमा रहेको नेपाली समुदायमा हुने विविध गतिविधि, सूचना र जानकारी पस्कने अनलाइन पत्रिका हो । info@nepalisrael.com
