हमासले २० जना सबै जीवित बन्धकहरु फिर्ता गर्यो, विपिन जोशीको अवस्था अझै अज्ञात

ट्रम्प इजरायलमा आइपुगे, हमासले सबै जीवित बन्धक रेडक्रसलाई बुझायो, दुई वर्षपछि सबै मुक्त भए तर विपिन जोशी फेला परेनन

नेपाल इजरायल डट कम ।

दुई वर्षअघि गाजाबाट अपहरणमा परेका सबै २० जना जीवित इजरायली बन्धकहरू सोमबार अन्ततः मुक्त भएका छन्। प्यालेस्टिनी लडाकु समूह हमासले बाँकी रहेका १३ जनालाई पनि अन्तर्राष्ट्रिय रेडक्रसका प्रतिनिधिहरूलाई औपचारिक रूपमा बुझाएको इजरायली सञ्चारमाध्यमहरूले पुष्टि गरेका छन्।

यसअघि हमासले पहिलो चरणमा ७ जना बन्धकहरूलाई रेडक्रसमार्फत इजरायली सेनालाई हस्तान्तरण गरेको थियो। त्यसपछि बाँकी १३ जनालाई पनि आज दिउँसो दक्षिणी गाजाबाट इजरायली भूभागतर्फ लगिएको हो।

रेडक्रसले ती सबै २० जना बन्धकहरू “स्वस्थ अवस्थामै, आफ्नै खुट्टामा हिंड्दै” इजरायली सेनाको जिम्मामा बुझाएको बताएको छ।
यसबाट हमासको नियन्त्रणमा अब एकजना पनि जीवित बन्धक बाँकी नरहेको पुष्टि भएको छ।

तर, यो खुशीको क्षणबीच एउटा गहिरो पीडा पनि जोडिएको छ — नेपाली विद्यार्थी विपिन जोशीको अवस्था अझै अज्ञात छ। ७ अक्टोबर २०२३ मा इजरायलको किब्बुज आलुमिमबाट अपहरणमा परेका विपिनबारे अहिलेसम्म कुनै ठोस जानकारी प्राप्त भएको छैन। हमासले दिएको जीवित बन्धकहरुको लिष्टमा उनको नाम समावेश नभएपछि सोमबार विहानै देखि उनको अवस्था अझै अज्ञात रहेको जानकारी इजरायली अधिकारीहरुले गराएका थिए ।

ट्रम्प इजरायलमा, शान्ति प्रयासको नयाँ चरण

यसैबीच, अमेरिकी राष्ट्रपति डोनाल्ड ट्रम्प इजरायल पुगेका छन्। इजरायली प्रधानमन्त्री बेन्जामिन नेतान्याहू र राष्ट्रपति इसाक हर्जोगले उनको स्वागत गरेका छन्।
हर्जोगको कार्यालयले ट्रम्पलाई “इजरायलको सर्वोच्च नागरिक सम्मान” प्रदान गरिने घोषणा गरेको छ, गाजामा भएको युद्धविराम सम्झौता र बन्धक मुक्तिमा उनको भूमिकाको कदरस्वरूप।

ट्रम्पको विमान आज बिहान “Hostages Square” माथिबाट उडेको थियो, जसले युद्धपछिको आशा र मुक्ति प्रतीकलाई स्मरण गरायो।
ट्रम्पले पत्रकारहरूसँग भने,

“यो सम्झौता मेरो राजनीतिक जीवनको सबैभन्दा ठूलो उपलब्धि हो — यो केवल शान्ति होइन, मानवीय मुक्ति हो।”

मिस्र भ्रमण र आगामी वार्ता

इजरायल भ्रमणपछि राष्ट्रपति ट्रम्प मिस्र प्रस्थान गर्ने कार्यक्रम रहेको छ। त्यहाँ उनले अरब राष्ट्रका नेताहरूसँग गाजा शान्ति स्थायित्वका लागि वार्ता गर्ने बताइएको छ।

इजरायली अधिकारीहरूका अनुसार, २८ जना बन्धकहरूको शव अझै हमासको कब्जामा रहेका छन्। तीमध्ये अधिकांशलाई आगामी घण्टाभित्र हस्तान्तरण गरिने तयारी भइरहेको बताइएको छ।

दुई वर्ष लामो भयावह प्रतीक्षापछि अधिकांश परिवारले आफ्ना प्रियजनलाई अँगालोमा पारेका छन् — तर नेपाली परिवारका लागि प्रतीक्षा अझै बाँकी छ। विपिन जोशीका आमाबुबा र परिवारजनले भनेका छन्, “जबसम्म सबै बन्धक फर्किँदैनन्, हामी विपिनको लागि आशाको ढोका बन्द गर्ने छैनौं।”