रास्वपाको प्रवास नेपाली सम्पर्क विभाग इजरायल गठन दुर्गा चापागाईको अध्यक्षतामा १५ सदस्यीय कार्यसमिति

२०२५ अगष्ट १५, शुक्रबार, तेलअविवमा इजरायलमा रहेका प्रवासी नेपालीहरूको प्रतिनिधित्व गर्दै राष्ट्रिय स्वतन्त्र पार्टीको प्रवास नेपाली सम्पर्क विभाग इजरायल गठन भएको छ । एक विशेष समारोहका बीच शुक्रबार साँझ प्रवास नेपाली सम्पर्क विभाग इजरायलको नया कार्यसमिति गठन गरिएको औपचारिक घोषणा भएको हो । इजरायलमा रहेका रास्वपाप्रति आस्था राख्ने नेपालीहरूको उत्साहपूर्ण सहभागिता रहेको उक्त कार्यक्रम गीत-संगीत र स्थानीय परिकारहरूको स्वादका साथ हर्षोल्लासपूर्वक सम्पन्न भएको थियो ।

इजरायल प्रवासमा आपसी भाइचारा सुदृढ पार्न र रास्वपाका नीति तथा कार्यक्रमको प्रचार प्रसारका लागि यस इजरायल २०२५/०२७ कार्यसमितिको सर्वसम्मत चयन गरिएको हो । तीन सदस्यीय निर्वाचन समितिले गत अगस्ट ७ मा प्रमुख, उप–प्रमुख र कोषाध्यक्ष पदमा एकभन्दा बढी उम्मेदवार मनोनयन दर्ता भएको जानकारी गराएको थियो । तर, लोकतान्त्रिक प्रक्रिया र आपसी समझदारीको उत्कृष्ट उदाहरण प्रस्तुत गर्दै, अगस्ट ११ र १२ मा उम्मेदवारहरू, सदस्य प्रतिनिधि तथा निर्वाचन समिति प्रतिनिधिहरूको रोहबरमा भएको सहमति र निर्णयअनुसार यो कार्यसमिति सर्वसम्मतिले चयन भएको हो । यो प्रक्रियाले प्रवासी नेपाली समुदायभित्र सौहार्दपूर्ण वातावरणमा नेतृत्व छनोट गर्न सकिन्छ भन्ने सन्देश दिएको छ ।

इजरायलको तेल अभिभमा भएको सो कार्यक्रममा गैर आवासीय नेपाली संघ राष्ट्रिय समन्वय परिषद इजरायलका अध्यक्ष गणेश गिरीले नव निर्वाचित कार्यसमितिका पदाध्हिकारीहरुलाई हार्दिक बधाई तथा शुभकामना व्यक्त गर्नु भयो । निर्वाचन समितिका संयोजक खेमराज जम्मर कट्टेलले प्रवासमा रहेका नेपालीहरु पनि देशको भविष्य बोकेको राजनीति प्रति सचेत हुदै गएको बताउनु भयो । उहाँलेको सभ्य समाजमा हरेक नागरिकमा हुनुपर्ने सामाजिक चेतनाको अपरिहार्यता औंल्याउदै प्रवासमा रहेका अन्य राजनीतिक संस्थाहरुले पनि रास्वपाको प्रवास बिभागबाट मूल्य मान्यतायुक्त परिष्कृत र संयमित राजनीतिक संस्कार अनुसरण गर्ने गरी कार्य गर्ने बताउनु भयो ।

कार्यक्रममा नवनिर्वाचित अध्यक्ष दुर्गा चापागाईं लगायत अन्य पदाधिकारीहरुले आ आफ्नो धारणा राख्दै राष्ट्रिय स्वतन्त्र पार्टीको केन्द्रिय समितिले अवलम्बन गरेका नीति तथा कार्यक्रमहरु तथा देशमा भै रहेको विकृति र विसंगति बिरुद्ध रास्वपाले उठाएका अभियानहरुमा तन, मन र वचनले डटेर साथ दिने प्रतिवद्धता व्यक्त गर्नु भएको थियो ।

नवनिर्वाचित कार्यसमितिका पदाधिकारीहरू:
नयाँ जिम्मेवारीका साथ प्रवासी नेपालीहरूको सेवामा समर्पित हुन तयार रहेका नवनिर्वाचित पदाधिकारीहरूको विवरण यस प्रकार रहेको छ ।

• प्रमुख: दुर्गा प्रसाद चापागाईं
• उप-प्रमुख: लक्ष्मी अधिकारी तिम्सिना
• सचिव: जनक राज खड्का
• सह-सचिव: खुस्बु नेपाल
• कोषाध्यक्ष: नकुल लामिछाने
• सह-कोषाध्यक्ष: मन्जु सापकोटा
• सदस्यहरू:
◦ भैरव बहादुर कार्की
◦ दिपक भट्टराई
◦ केशव गौतम
◦ बिष्णु उप्रेती
◦ नम्रता पाठक
◦ गीता कार्की
◦ देवि खरेल पाण्डे
◦ बिन्दा खड्का बुढाथोकी
◦ बिनिता बराम

यस नवगठित कार्यसमितिले इजरायलमा रहेका नेपाली समुदायको हितका लागि सक्रिय रूपमा कार्य गर्दै रास्वपाका आदर्शहरूलाई अझ उचाइमा पुर्‍याउने विश्वास गरिएको छ ।