२ बर्ष अघि अपहरणमा परेका नेपाली विद्यार्थी विपिन जोशीको खोजी गर्दै बहिनी र आमा इजरायलमा

नेपाल इजरायल डट कम । झन्डै दुई वर्षदेखि हमासको नियन्त्रणमा रहेका विपिन जोशीको खोजी गर्दै उनकी आमा पद्मा र बहिनी पुष्पा इजरायल आइपुगेका छन् । पद्मा र पुष्पाको आज इजरायलस्थित नेपाली राजदूतले विमानास्थलमा स्वागत गरे । राजदूतले उनीहरुले इजरायलका राष्ट्र प्रमुख लगायत उच्च ओहोदाका इजराइली कर्मचारी, आर्मी र नेताहरूसँग भेटघाट गर्नुहुने बताएका छन् ।

अर्न एण्ड लर्न कार्यक्रम अन्तरगत कृषि तालिमका लागि इजरायल गएका कन्चनपुरका विपीन जोशीको अपहरण भएको २ वर्ष पुग्न लागेको छ । ७ अक्टोबर २०२३ मा हमासद्धारा अपहरणमा परेका जोशीको अवस्थाको बारेमा कुनै टुंगो लाग्न सकेको छैन ।

त्यहीक्रममा मनमा आशाको दियो बालेर, उनको आमा र बहिनी विपिनको खोजीको लागि इजरायल आएका हुन् । परिवारका सदस्यहरुका अनुसार जोशीको वास्तविक अवस्था पत्ता लगाएर मात्र फर्किने अठोटसहित उनीहरु इजरायल आएका हुन् ।

उनीहरुलाई इजरायलको तेलअविवस्थित वेनगुरियन अन्तर्राष्ट्रिय विमानस्थलमा इजरायली विदेश मन्त्रालयका अधिकारी, इजरायलका लागि नेपाली राजदूत धनप्रसाद पण्डित, नेपालका लागि पूर्वराजदूत हानन गोदार लगायतले स्वागत गरेका थिए ।

त्यहाँ अन्तर्राष्ट्रिय सञ्चार माध्यमका पत्रकारहरुलाई प्रतिक्रिया दिँदै विपिनकी आमा पद्माले आफूहरु विपिनलाई लिन आएको भन्दै सहयोगको अपिल गरिन् । उनले भक्कानिँदै भनिन्, ‘म मेरो छोरो विपिनलाई लिन आएकी हुँ । मेरो छोरालाई मुक्त गराएर हामीसँगै घर पठाइदिनुस्, सबैमा विनम्र अनुरोध छ ।’

यो आगमन केवल एउटा यात्रा होइन, यो त एउटा अविचलित प्रेमको यात्रा हो, जसको गन्तव्य अक्टोबर ७, २०२३ को कालो दिनमा बेपत्ता भएका छोरा र भाइ, बिपीन जोशीको खोजी हो।

कान्छो छोरा इजरायलमा कृषि तालिमका लागि गएका थिए, “अर्न एण्ड लर्न” कार्यक्रमअन्तर्गत । कन्चनपुरका २३ वर्षीय विपिन, भविष्यका सुन्दर सपनाहरू आँखामा सजाएर इजरायल पुगेका थिए, अक्टोबर ७ को घटना हुनुभन्दा करिब तीन हप्ताअघि मात्रै । तर, किबुच अलुमिम नामक कृषि फार्ममा काम गरिरहेकै बेला, हमासको क्रूर आक्रमणले उनको सपना चकनाचुर भयो । उनी अन्य विदेशी नागरिक र इजरायलीहरूसँगै गाजापट्टीमा बन्धक बनाइए । त्यो भयानक आक्रमणमा विपिनसँगै रहेका १० जना निर्दोष नेपाली विद्यार्थीहरूले ज्यान गुमाए, र अन्य घाइते भए । कल्पना गर्नुहोस्, एउटै कोठामा बसेका साथीहरूमध्ये कोही फर्किएनन्, कोही घाइते भए, र कोही बेपत्ता भए।

आज, आमा पद्मा र बहिनी पुष्पा, विपिनको अवस्था पत्ता लगाएर मात्र फर्कने अठोटका साथ इजरायल आइपुगेका छन् । तेल अबिबमा रहेको नेपाली राजदूतावासले उनीहरूलाई राष्ट्रपति आइज्याक हर्जोग र प्रधानमन्त्री बेन्जामिन नेतान्याहु लगायत उच्च ओहोदाका इजरायली अधिकारीहरूसँग भेट गराउनेछ । रक्षामन्त्री, सेना प्रमुख र हमासविरुद्धको कारबाहीमा खटिएका कमान्डरहरूसँग पनि भेट गराउने तयारी छ । यो भेटघाटले विपिनको खोजीमा नयाँ आयाम थप्ने छ।

विमानास्थलमा ओर्लिने बित्तिकै आमा पद्माका आँखाबाट आँसुका धारा बगे, र उनको आवाजमा एउटा हृदयविदारक प्रार्थना गुन्जियो: “बचाइदिनुहोस्! उसलाई घर फर्काइदिनुहोस्!” यो हरेक आमाको पुकार हो, जसको सन्तान घर फर्केको छैन। बहिनी पुष्पाले पनि सहयोगका लागि सबैलाई धन्यवाद दिँदै, “यो दुई वर्ष भन्दा बढी भइसक्यो, यो हाम्रो लागि अति नै भयो,” भनिन् । उनीहरूको यो यात्रा केवल व्यक्तिगत खोजी मात्र होइन, यो विश्वभरका बन्धक र बेपत्ता परिवारहरूको साझा पीडा र वेदना हो।

इजरायलस्थित नेपाली राजदूत, नेपालका लागि पूर्व इजरायली राजदूत, नेपालका सद्भावना दुत, स्थानीय सामाजिक कार्यकर्ता, स्वयंसेवी नेपाली दूतावासका कर्मचारी, विपिन जोशीका साथीहरु पनि उनको आमा र बहिनीको स्वागतका लागि विमानास्थल पुगेका थिए ।

विपिन जोशी संगै किबुच आलुमिममा कार्यरत सोही आक्रमणमा परी घाइते भएर बाँचेका नेपाली विद्यार्थीहरु गोरखाका हिमाञ्चल कट्टेल, सल्यानका विधान सेज्वाल र दाङका प्रवीण डाँगी उपचार पश्चात इजरायली सरकारको छात्रवृत्तिमा इजरायलमै अध्ययनरत छन ।

इजरायली विदेश मन्त्रालयका अधिकारीका अनुसार विपिनकी आमा र बहिनीलाई संयुक्त राष्ट्रसंघको कार्यालयमा उपस्थित गराई विपिनलाई छुटाउनका लागि दबाब बढाइदिन आग्रह गर्ने तयारी छ ।

तस्बिर – सुनिता गुरुङको फेसबुक वाल र वाइनेट न्युज `