मुनी एक्स्पो २०२५’ मा सहभागी हुन नेपाली प्रतिनिधिमण्डल इजरायलमा

नेपाल इजरायल डट कम

इजरायलको स्थानीय सरकार महासंघद्वारा आयोजना हुन लागेको विश्वकै अग्रणी अन्तर्राष्ट्रिय शहरी नवप्रवर्तन सम्मेलन ‘मुनी एक्स्पो २०२५’ मा भाग लिन नेपाल सरकारका विभिन्न निकायबाट १४ सदस्यीय उच्चस्तरीय प्रतिनिधिमण्डल इजरायलको सरकारी भ्रमणमा आएको छ। इजरायलको परराष्ट्र मन्त्रालयको आधिकारिक निमन्त्रणामा चलिरहेको साताव्यापी भ्रमणमा शहरी विकास मन्त्रालय, राष्ट्रिय योजना आयोगका नीतिगत तथा योजना निर्माणका वरिष्ठ अधिकारीहरू साथै नेपालका विभिन्न नगरपालिकाका प्रमुखहरू समावेश छन्। यो सम्मेलनमा नेपालको सरकारी अधिकारीहरूको सहभागिता यो पहिलो पटक हो।

‘मुनी एक्स्पो’ इजरायलकै सबैभन्दा ठूलो नगरपालिका सम्मेलन मानिन्छ, जहाँ विश्वका मेयर, नीति निर्माता तथा शहरी योजनाकारहरू एकत्रित हुन्छन्। यस वर्षको सम्मेलनको मुख्य विषयवस्तु “लोकल कम्पास” रहेको छ, जसले संकट व्यवस्थापन, स्थानीय र राष्ट्रिय सरकारबीच सहकार्य, साथै यहुदीविरोधी क्रियाकलापविरुद्धको सामना जस्ता संवेदनशील र महत्वपूर्ण विषयहरूमा केन्द्रित रहने छ।

नेपाली प्रतिनिधिमण्डलले सम्मेलनमा १५० भन्दा बढी इजरायली र अन्तर्राष्ट्रिय कम्पनी तथा स्टार्टअपहरूसँग अन्तरक्रिया गर्ने, आधुनिक शहरी परियोजनाहरूको अवलोकन गर्ने र विश्वव्यापी साझेदारी विस्तार गर्ने सुनौलो अवसर पाउनेछन्।

सम्मेलनका अतिरिक्त, प्रतिनिधिमण्डलले यरुशलम, तेलअविभ, जाफा, याड भासेम होलोकास्ट स्मृति केन्द्र, शाफ्दान फोहोर पानी प्रशोधन केन्द्र, नगर नवप्रवर्तन केन्द्र र स्देरोतस्थित प्रहरी कार्यालयजस्ता महत्वपूर्ण स्थानहरूको भ्रमण गर्ने छ। साथै, अक्टोबर ७, २०२३ मा हमास आतङ्ककारी समूहले निर्दोष नेपालीहरूलाई समेत लक्षित गरी आक्रमण गरेको नोभा महोत्सव स्थलको अवलोकन पनि गर्ने कार्यक्रम पनि रहेको छ। उक्त दिन हमासले किबुत्ज अलुमिममा १० नेपाली नागरिकको हत्या गरेको थियो भने एक नेपाली विद्यार्थी विपिन जोशीलाइ बन्धक बनाएका थिए, हालसम्म उनको अवस्था अज्ञात रहेको छ।

इजरायलस्थित नेपाली राजदूतावासले यस प्रतिनिधि भ्रमणले नेपाल–इजरायलबीच शहरी विकास, क्षमता अभिवृद्धि र ज्ञान आदानप्रदानमा दीर्घकालीन सहकार्यलाई थप सुदृढ पार्ने विश्वास व्यक्त गरेको छ। यो भ्रमणले दुई देशबीचको समग्र सहकार्य र मित्रतालाई नयाँ उचाइमा पुर्‍याउने अपेक्षा गरिएको छ।