हुथीद्वारा इजरायलको एअरपोर्टमा लक्षित गरेर तीव्र गतिको व्यालेस्टिक मिसाइल प्रहार

तेल अभिव – यमनबाट हुथी विद्रोहीहरूले प्रक्षेपण गरेको क्षेप्यास्त्र इजरायली आकाशमा प्रवेश गर्नुअघि नै इजरायल रक्षा बल (IDF) ले अवरुद्ध गरेको छ। यस हमलापछि इजरायलभर सायरन बजेको थियो।

मगेन डेभिड अडोम (Magen David Adom) का अनुसार, यो हमलामा कुनै प्रत्यक्ष हताहति नभएको भए पनि सुरक्षित स्थलतर्फ दौडने क्रममा केही व्यक्ति घाइते भएका छन् भने केहीलाई अत्यधिक तनावका कारण स्वास्थ्य समस्या देखिएको छ।

त्यस्तै, गाजा क्षेत्रमा फिलिस्तिनी स्रोतहरूले जानकारी दिएअनुसार उत्तर गाजामा इजरायली सेनाले तीव्र तोपखाना हमला सुरू गरेको छ। दक्षिणी खान युनिस क्षेत्रमा इजरायली आक्रमणका कारण कम्तीमा १८ जनाको मृत्यु भएको तथा दर्जनौँ घाइते भएका छन्।

यस हमलापछि इजरायली सेनाले गाजा आतंककारी समूहविरुद्धको सैन्य अभियान पुन: तीव्र पार्दै केन्द्रिय नेत्जारिम कोरिडोर हुँदै भू-आक्रमण सुरु गरेको छ। इजरायली अधिकारीहरूका अनुसार, रणनीतिक रूपमा महत्वपूर्ण यस क्षेत्रमाथि पुन: नियन्त्रण स्थापित गर्ने लक्ष्यसहित कारबाही अगाडि बढाइएको छ।

विभिन्न चरणमा बन्धकहरु रिहा गर्ने शर्त राखेर जनवरीमा सुरु भएको इजरायल हमास बिचको युद्ध बिराम पहिलो चरण सकिदा नसकिदै अन्त्य भएको छ । युद्धविराम भंग भएर पुन युद्ध चर्किएपछि हमासले अपहरण गरेर लगेका नेपाली विद्यार्थी विपिन जोशीको रिहाइमा फेरी अर्को पटक पनि अन्योलता छाएको छ ।