हमास ३४ बन्धक रिहा गर्न तयार, विपिन जोशीको अवस्था के होला ?

नेपाल इजरायल डट कम जेरुसलेम । हमास ३४ बन्धक रिहा गर्न तयार भएको समाचार आएको छ । इजरायलसँगको युद्ध विराम सम्झौताको पहिलो चरण अन्तर्गत हमासले ३४ जना इजरायली बन्दीहरूलाई रिहा गर्न सहमति जनाएको हो । यस कदमले मध्यपूर्वमा शान्तिको सम्भावना र थप वार्ताका लागि सकारात्मक वातावरण सिर्जना गर्ने अपेक्षा गरिएको छ।

प्यालेस्टिनी सञ्चारमाध्यमले जनाएअनुसार गाजा स्ट्रिपमा शासन गर्ने हमासले युद्ध विरामको सहमतिमा ती बन्दीहरूलाई रिहा गर्न तयार रहेको जानकारी दिएको छ। यो प्रक्रिया बन्दी आदानप्रदान सम्झौताको हिस्सा भएको बताइएको छ।

रिहाइ हुने बन्दीहरू
स्रोतहरूका अनुसार, प्रारम्भिक बन्दी आदानप्रदानमा रिहा गरिने ३४ जना बन्दीहरूमा महिला, बालबालिका, वृद्धवृद्धा, र गम्भीर बिरामी व्यक्ति सामेल हुनेछन्। हमासले यी बन्दीहरूलाई प्राथमिकतामा राख्दै रिहा गर्न सहमति जनाएको छ। युद्ध विराम सम्झौतामा हमासले गाजाबाट इजरायलमा बन्दीहरूलाई फिर्ता गर्ने, र इजरायलले स्थायी युद्ध विरामको पक्षमा थप कदम चाल्ने अपेक्षा गरिएको छ। दुबै पक्षले सम्झौताका थप चरणहरूमा निर्भर गर्दै आफ्नो रणनीति निर्माण गर्ने संकेत गरेका छन्।

बालबालिका सहित हमासद्वारा अपहरणमा परेको विवस परिवार

मध्यपूर्वमा शान्तिको संकेत?
इजरायलका प्रधानमन्त्री बेन्जामिन नेतान्याहुको कार्यालयले आइतबार हमासले सम्भावित रिहाइका लागि बन्दीहरूको सूची उपलब्ध गराएको बताएको छ। यसै सन्दर्भमा, कतारमा युद्ध विराम सम्झौताका लागि भइरहेका वार्तामा दुवै पक्षले आफूअनुकूल धारणा प्रस्तुत गरेका छन्।

गाजा स्ट्रिपमा युद्ध विराम सम्झौताका विभिन्न चरणहरूबारे भइरहेको वार्ताले लामो समयदेखि चलेको द्वन्द्वमा केही राहत दिने अपेक्षा गरिएको छ। यस विषयमा अन्तर्राष्ट्रिय समुदायले पनि सकारात्मक प्रतिक्रिया जनाइरहेको छ।

विपिन जोशीको अवस्था के होला ?
हाल तयार गरिएको ड्राफ्ट अनुसार महिला बालबालिका, बृद्ध वृद्धा र बिरामी फिर्ता गर्ने भनिएको छ । इजरायलबाट अपहरणमा परेका विदेशी नागरिक रिहा गर्ने भन्ने व्यहोराको जानकारी हालसम्म प्राप्त नभैसकेको हुँदा विपिन जोशी अहिले नै रिहा हुने सम्भावना न्यून छ यद्यपि यो सम्झौता आफैमा सकारात्मक पक्ष हो । यदि यो कार्यान्वयन भएको खण्डमा भविष्यमा बाँकी बन्दीहरु पनि रिहा हुने सम्भावना बढ्ने छ ।