इजरायलमा साई बाबाको ९९ औ जन्म जयन्ती मनाइदै

सत्य साई सेन्टर इजरायलले यस वर्षको साई जयन्ती नोभेम्बर २३, २०२४, मा तेल अविवको हार्चीयोनस्थित सेन्टरमा आयोजना गर्दैछ। साई बाबाको जीवन, शिक्षाहरू, र सेवामूलक कार्यहरूको स्मरण गर्दै यो कार्यक्रमको आयोजना गरिँदैछ।

सत्य साई सेन्टरले उक्त दिन भक्तिपूर्ण भजन, ध्यान, प्रवचन, र परोपकारी गतिविधिहरू समेटेर कार्यक्रम गर्नेछ। यस कार्यक्रमले भक्तजनहरूलाई साई बाबाको जीवन र दर्शनप्रति प्रेरित गर्ने लक्ष्य राखेको छ। यस अवसरमा इजरायलका साथै अन्य देशबाट पनि साई भक्तहरूको सहभागिता अपेक्षा गरिएको छ।

सन् १९२६ नोभेम्बर २३ मा भारतको आन्ध्र प्रदेशमा जन्मेका सत्य साई बाबा केवल भारतमा मात्र होइन, विश्वभरि नै मानवताको सेवा, आध्यात्मिकता, र भाइचारा प्रवर्द्धन गर्ने धर्म गुरुका रूपमा परिचित छन्। उनले आफ्नो जीवनभरि शिक्षा, स्वास्थ्य सेवा, र मानवताको सेवा गर्ने अनेकौं परियोजनाहरू सञ्चालन गरे। सत्य साई बाबाको निधन सन् २०११ अप्रिल २४ मा भए तापनि उनका शिक्षाहरू आज पनि विश्वभरि प्रेरणादायक बनेका छन्।

सत्य साई सेन्टर इजरायलले प्रत्येक वर्ष सत्य साई बाबाको जन्म जयन्ती विशेष श्रद्धा र भक्तिसहित मनाउँदै आएको छ।

कार्यक्रम स्थल:
सत्य साई सेन्टर, हार्चीयोन, तेल अविव, इजरायल
मिति र समय:
नोभेम्बर २३, २०२४, बिहान १०:०० बजेदेखि।