अस्ट्रेलियामा एक नेपाली युवतिको मृत्यु - माइती पक्ष निष्पक्ष अनुसन्धान र न्याय खोज्दै

अस्ट्रेलियामा एक नेपाली युवतिको मृत्यु – माइती पक्ष निष्पक्ष अनुसन्धान र न्याय खोज्दै

पुरानो सम्बन्धको बारेमा विवाहपूर्व नै सम्पूर्ण यथार्थ जानकारी नदिएर आफ्ना छोरी चेलीलाई मानसिक विक्षिप्तताको स्थितिमा पुराएको, चार महिनासम्म बाहिरी संसारबाट अलग बन्धकजस्तो स्थिति बेहोर्नुपरेको जस्ता गम्भीर गुनासा र प्रश्नहरू उठाएका छन् ।

अस्ट्रेलियाबाट फेरि अर्को दुखद खबर आएको छ । अस्ट्रेलियाको सिड्नीस्थित हाइड पार्क नजिकै रहेको सानो पार्कमा एक नेपाली युवतिको शव झुन्डिएको अवस्थामा फेला परेको छ ।

गैर आवासीय नेपाली सङ्घ राष्ट्रिय समन्वय परिषद्, न्यु साउथ वेल्सले घटनाको पुष्टि गर्दै जानकारी दिएको छ ।

भर्खर विवाह गरेर पठाएकी चेलीको यस्तो अप्रत्याशित खबर सुनेपछि नेपालमा उनका आफन्त अत्यन्त मर्माहत बनेका छन् । दीक्षाको निधनमा उनीहरूले गहिरो आशङ्का व्यक्त गरेका छन् ।

माइती पक्षले जनाए अनुसार अस्ट्रेलियाका पिआर वाहक उनका श्रीमानले सुरुमै उनलाई अस्ट्रेलिया नै गलत बाटोबाट लिएर गएको, उनको पुरानो सम्बन्धको बारेमा विवाहपूर्व नै सम्पूर्ण यथार्थ जानकारी नदिएर आफ्ना छोरी चेलीलाई मानसिक विक्षिप्तताको स्थितिमा पुराएको, चार महिनासम्म बाहिरी संसारबाट अलग बन्धकजस्तो स्थिति बेहोर्नुपरेको जस्ता गम्भीर गुनासा र प्रश्नहरू उठाएका छन् ।

माइती पक्षले दीक्षाको न्याय र आत्माको शान्तिका लागि नेपाली समुदायसँग साथ र सहयोगको अपेक्षा राखेका छन् । हतार हतार आत्महत्या भएको भन्दै खबर आउनु, शव व्यवस्थापन समेत अस्ट्रेलियामै गर्छौँ भन्नु, सञ्चारमा बारम्बार गोपनीयता भन्दै घटना नै लुकाउन खोज्नु जस्ता गतिविधिहरूले उनीहरू अझ बढी सशङ्कित भएका छन् ।

अनजान सहरमा २५ किलोमिटर टाढा शव भेटिएको भनिएको छ , कसरी गइन ? उनले पैसा पनि नबोकेको र फोन समेत उनीसँग थिएन भनिएको छ । त्यति टाढाको स्थानमा कसरी पुगिन, वा कसैले पहिले नै घटना घटाएर त्यहाँसम्म पुराएको हो ?

सर्वप्रथम त माइती पक्षले उनको मृत्युलाई सहज आत्महत्याको रूपमा स्विकार्न तयार छैन , यदि आफै गएर गलत कदम चालेकै भए पनि त्यति धेरै रहर बोकेर अस्ट्रेलिया पुगेकी छोरीलाई के बाध्यताले यस्तो स्थितिसम्म पुर्‍यायो उनीहरूको प्रश्न छ ।

यस विषयमा गम्भीर अनुसन्धान गरियोस् भन्ने माइती पक्षको अनुरोध छ , मृतकका श्रीमानको पूर्व पत्नीसँगको सम्बन्धलाई लिएर पनि दीक्षालाई मानसिक पीडामा पारिएकोले उनलाई समेत अनुसन्धानको दायरामा ल्याइनुपर्ने भन्दै सचेत नेपाली समुदायसँग माइती पक्षले अनुनय गरेको छ ताकि भोली कसैका छोरी चेलीले यस्तो अकाल मृत्युवरण गर्ने स्थिति नआओस् ।

श्रीमान रवि प्रसाई र दीक्षाको विवाहको तस्बिर ( फोटो : परिवार )

झापाको मेचीनगर नगरपालिका वडा नं १४ धाइजन घर भएकी २७ वर्षकी दिक्षा शिवाकोटी प्रसाईँको एक वर्ष अगाडी अस्ट्रेलियाको सिड्नीमा बस्दै आएका नेपाली रवि प्रसाईँसँग मागी विवाह भएको थियो । उनी चार महिना अगाडी मात्रै अस्ट्रेलिया आएकी थिइन भने उनले हराएको एक दिन अगाडी मात्रै काम सुरु गरेकी थिइन ।

प्रहरीले उनलाई रातको बाह्र बजे झुन्डिएको अवस्थामा फेला पारेको थियो । उनको निधनका सम्बन्धमा प्रहरीले अनुसन्धान गरिरहेको एनआरएनए सिड्नीका संयोजक विनोद कुँवरले सञ्चार माध्यमलाई जानकारी गराएका थिए ।

गत ८ तारिख आइतबार एक घण्टा काम गरेर निस्किएपछि हराइरहेकी उनी रातको १२ बजे पार्कमा झुन्डिएको अवस्थामा फेला परेकी थिइन । यस दुखद घटनाले अस्ट्रेलियामा रहेका नेपाली समुदायलाई स्तब्ध बनाएको छ ।

नेपालमा रहेको उनको परिवारले यस घटनाको सत्य तथ्य र निष्पक्ष अनुसन्धानका लागि अनुरोध गर्नुका साथै अन्तिम संस्कारका लागि उनको शव नेपाल पठाइदिन नेपाली समुदायसँग आग्रह पनि गरेका छन् ।