विपिन जोशीको बाटो हेर्दै परिवार, परराष्ट्रमन्त्रीको कतार भ्रमणमा थप पहल हुने

प्यालेस्टाइनी हमास समूहको नियन्त्रणमा रहेका भनिएका कञ्चनपुरका विपिन जोशीको परिवारले उनी फर्किने आशामा सरकारलाई निरन्तर घचघच्याइरहेका छन् । प्रधानमन्त्रीदेखि मन्त्रीसम्मले विपिनको रिहाइमा पहल गरिरहेको जवाफ दिइरहेपनि बेपत्ता भएको दुई महिनासम्म कुनै नतिजा निस्कन सकेको छैन । प्रशिक्षार्थी कामदारको रुपमा इजरायल पुगेका उनी इजरायली भूमिमा भएको हमलासँगै बेपत्ता भएका थिए ।

परिवारले तीन पटक परराष्ट्रमन्त्रीलाई भेटिसकेको छ भने प्रधानमन्त्रीलाई समेत एक पटक भेटेर छोरालाई सकुसल फिर्ता पठाउन आग्रह गरेपनि उही पुरानो जवाफ ‘पहल भइरहेको भन्ने’ आउने गरेको छ । भीमदत्त नगरपालिका–३ का महानन्द जोशीले छोराको रिहाइका लागि पहल भइरहेको मात्रै जवाफ आउने गरेको बताए ।

यसैबीच परराष्ट्र मन्त्री एनपी साउद शनिबार कतार प्रस्थान गरेका छन् । कतारको दोहामा सुरु हुने २१ औँ दोहा फोरममा सहभागी हुन त्यसतर्फ प्रस्थान गरेका साउद त्यहाँ पनि कतारी अधिकारीहरुसँग विपिनको रिहाइका लागि पहल गर्ने बताइएको छ ।