गाजामा पत्रकारहरूसहित २० जनाको ज्यान गयो

गाजाको दक्षिणी क्षेत्रमा रहेको नास्सेर अस्पतालमा हालै भएको इजरायली हवाई आक्रमणले ठूलो क्षति पुर्‍याएको छ। यस दुखद घटनामा पाँच जना पत्रकारसहित कम्तीमा २० जनाले ज्यान गुमाएका छन्।

अन्तर्राष्ट्रिय समाचार एजेन्सीहरूका अनुसार, सोमबार भएको यस आक्रमणले धेरैको ज्यान लिएको हो। इजरायली प्रधानमन्त्री बेन्जामिन नेतान्याहुले यसलाई ‘दुर्भाग्यपूर्ण दुर्घटना’ भन्दै खेद व्यक्त गरेका छन्। इजरायली सेनाले नास्सेर अस्पतालनजिकै आफ्ना सैनिकहरूले कारबाही गरेको स्वीकार गर्दै सेनाका प्रमुखले तत्काल प्रारम्भिक छानबिन गर्न निर्देशन दिएको जनाएको छ।

यस आक्रमणमा रोयटर्सका भिडियो पत्रकार हुशाम अल-मस्रीको निधन भएको पुष्टि भएको छ, भने अर्की सहकर्मी हातेम खालेद घाइते भएकी छिन्। रोयटर्सले यस घटनालाई ‘विनाशकारी’ भन्दै थप विवरणको खोजी गरिरहेको जनाएको छ। कतारस्थित अल-जजिराले आफ्ना फोटो पत्रकार मोहम्मद सलामाको मृत्यु भएको पुष्टि गर्दै घटनालाई ‘पत्रकारहरूको योजनाबद्ध हत्या’ भन्दै कडा शब्दमा निन्दा गरेको छ।

एसोसिएटेड प्रेसले पनि आफ्ना लागि फ्रील्यान्सरका रूपमा काम गरिरहेकी ३३ वर्षीया भिजुअल पत्रकार मरियम डग्गाको निधनप्रति गहिरो शोक व्यक्त गरेको छ। प्यालेस्टिनी पत्रकार महासंघले मोआज अबु ताहा र अहमद अबु अजिजका रूपमा थप दुई पत्रकारको नाम सार्वजनिक गरेको छ। सोही दिन राति, अस्पतालले अर्का पत्रकार हसन दौहान पनि मारिएको जानकारी दिएको छ।

आक्रमणपछि अस्पताल वरिपरि धुवाँ उठिरहेको र रगताम्य शवहरू भुइँमा छरिएका हृदयविदारक दृश्यहरू देखिएका थिए। स्वास्थ्यकर्मी र सर्वसाधारणले घाइते र शवहरूलाई अस्पतालभित्र लैजाने प्रयास गरिरहेका थिए। नास्सेर अस्पताल गाजामा अझै आंशिक रूपमा सञ्चालनमा रहेका थोरै स्वास्थ्य संस्थाहरूमध्ये एक हो। आक्रमणमा मारिएका पत्रकारहरूको शवलाई प्रेस ज्याकेटसहित सेतो कफनमा बेरेर सोमबार साँझ खान युनिसमा अन्तिम संस्कार गरिएको थियो।

पत्रकारहरूको हितका लागि काम गर्ने संस्थाहरूका अनुसार, करिब दुई वर्षदेखि जारी आक्रमणका क्रममा गाजामा करिब २०० पत्रकार मारिइसकेका छन्, जसले यो युद्धलाई पत्रकारहरूका लागि अहिलेसम्मकै सबैभन्दा घातक बनाइदिएको छ। यसअघि पनि गाजास्थित अल-सिफा अस्पतालनजिकै भएको इजरायली हवाई आक्रमणमा अल-जजिराका पत्रकारसहित ६ जना मारिएका थिए, जसले व्यापक आलोचना निम्त्याएको थियो।

यस घटनाको तत्काल स्पष्टीकरणको माग गर्दै संयुक्त राष्ट्रसंघ, अन्तर्राष्ट्रिय सञ्चारगृहहरू, मानवअधिकार संस्थाहरू र इजरायलस्थित परदेशी सञ्चार संगठनले ध्यानाकर्षण गराएका छन्। यो घटनाले युद्धग्रस्त क्षेत्रमा पत्रकारहरूको सुरक्षामाथि गम्भीर प्रश्न उठाएको छ।