वासिङ्टन डीसी । इजरायल–हमासबीच चलिरहेको युद्ध अन्त्य गर्नका लागि इजिप्टमा शान्ति वार्ता तीव्र गतिमा अघि बढिरहेको छ। गाजामा स्थायी शान्ति स्थापनाका उद्देश्यले सुरु भएको यो वार्तामा अमेरिकी विशेष दूत स्टिभ विटकफ र पूर्व राष्ट्रपति डोनाल्ड ट्रम्पका ज्वाइँ जारेड कुश्नर पनि सहभागी हुन लागेका छन्।
बीबीसीका अनुसार, मंगलबार दोस्रो दिनको वार्ता कुनै ठोस नतिजा बिना टुंगिएपछि अमेरिकी पक्षबाट विटकफ र कुश्नर वार्तामा सहभागी हुने तयारी भइरहेको छ। उनीहरू अमेरिकी समयअनुसार मंगलबार साँझ इजिप्टका लागि प्रस्थान गर्दै छन्।
दुई वर्षअघि हमासले दक्षिणी इजरायलमा आक्रमण गरेको स्मरणमा मङ्गलबार दोस्रो वार्षिकोत्सव मनाइँदै थियो। सोही अवसरमा पूर्व राष्ट्रपति ट्रम्पले “मध्यपूर्वमा शान्तिको सम्भावना अझै बाँकी छ” भन्दै सकारात्मक टिप्पणी दिएका थिए।
इजरायली प्रधानमन्त्री बेन्यामिन नेतन्याहुले भने वार्ताको अवस्थाबारे कुनै टिप्पणी नगरे पनि सामाजिक सञ्जाल एक्स (X) मा लेख्दै युद्धका लक्ष्य पूरा नभएसम्म इजरायलले आफ्नो प्रयास जारी राख्ने बताएका छन्।
इजिप्टमा भइरहेको वार्तामा कतारका प्रधानमन्त्री शेख मोहम्मद बिन अब्दुल रहमान अल थानी मुख्य मध्यस्थको भूमिकामा छन्। अल थानीले युद्धविराम र बन्दीहरूको रिहाइ सम्झौता सम्भव बनाउन जोड दिने जनाइएको छ।
कतारका विदेश मन्त्री र टर्किश गुप्तचर संस्थाका प्रमुख पनि वार्तामा उपस्थित हुने अपेक्षा गरिएको छ।
सन् २०२३ को अक्टोबर ७ मा हमासले दक्षिणी इजरायलका किब्बुज क्षेत्रमा गरेको आक्रमणमा नेपालका कृषि विद्यार्थी विपिन जोशी अपहरणमा परेका थिए। उनी कञ्चनपुरको महेन्द्रनगरका निवासी हुन् र किब्बुज आलुमिममा “Learn and Earn” कार्यक्रममा सहभागी रहेका बेला हमास लडाकूहरूले उनलाई कब्जामा लिएका थिए।
त्यसयता उनको अवस्था अझै अज्ञात छ। उनकी आमा पद्मा जोशी र बहिनी पुष्पा जोशीले गत वर्ष इजरायल र हालै अमेरिका पुगेर अन्तर्राष्ट्रिय समुदायसँग सहयोगको अपिल गरिरहेका छन्।
नेपाली समुदायले विश्वभरबाट “Free Bipin Joshi” अभियान सञ्चालन गर्दै आएका छन्।
विपिन जोशी सम्बन्धी सबै अपडेटहरुका लागि यहाँ क्लिक गर्नुहोस ।
गाजा शान्ति वार्तामा बन्दीहरूको रिहाइ मुख्य एजेन्डा भएकाले, नेपालीहरू यो वार्ताले विपिनको मुक्तिका लागि नयाँ आशा दिलाउने विश्वास गरिरहेका छन्।
मध्यपूर्वमा जारी यो संवेदनशील वार्ता केवल इजरायल र हमासबीचको संघर्ष अन्त्यका लागि मात्र होइन, हजारौं निर्दोष मानिस र दर्जनौं अपहृतहरूको जीवनसँग जोडिएको छ।
नेपाली नागरिकको तर्फबाट यो वार्ताले एक सानो तर गहिरो आशा बोकेको छ—विपिन जोशी फर्किऊन्, र
इजरायल र हमासको यो युद्ध सधैंका लागि अन्त्य होस् ।
नेपाल इजरायल डट कम - इजरायलमा रहेको नेपाली समुदायमा हुने विविध गतिविधि, सूचना र जानकारी पस्कने अनलाइन पत्रिका हो । info@nepalisrael.com
